وزیر مملکت برائے نیشنل ہیلتھ سروسز،ریگولیشنز و کوآرڈینیشن سائرہ افضل تارڑ کا فارماسیوٹیکل ایکسپورٹ سیمینارسے خطاب

لاہور۔7 جولائی (اے پی پی )وزیر مملکت برائے نیشنل ہیلتھ سروسز،ریگولیشنز و کوآرڈینیشن سائرہ افضل تارڑ نے کہاہے کہ گزشتہ 3 سالوں میں ڈرگ ریگولیشنز کے حوالے سے کی جانیوالی اصلاحات کی وجہ سے پاکستانی فارماسیوٹیکل مصنوعات کی ایکسپورٹ میں بہت بہتری آئی‘ ملکی تاریخ میں پہلی بار تمام ادویات کے پیکس پر بار کوڈ متعارف کروائے جارہے ہیں جس کی وجہ سے ملکی برآمدات کو مزید فروغ حاصل ہو گا، وہ جمعہ کے روز یہاں مقامی ہوٹل میں فارماسیوٹیکل ایکسپورٹ سیمینار کی صدارت کر رہی تھیں‘ اس موقع پر صوبائی وزیر خواجہ عمران نذیر و دیگر شخصیات بھی موجود تھیں‘ سائرہ افضل تارڑ نے کہا ہے کہ نیشنل فارماسیوٹیکل انڈسٹری ،ڈرگ ریگولیٹری اتھارٹی اور وزارت نیشنل ہیلتھ سروسز کی 40 ممالک کو معیاری ادویات کی اےکسپورٹ اور گھریلو سطح پر ادویات کی ضروریات کو پورا کرنے کیلئے اہم پارٹنر ہے‘ انہوں نے کہا کہ اگرچہ موجودہ حکومت کو کئی مسائل ورثہ میں ملے تاہم حکومت نے چیلنجز سے نمٹنے کے ساتھ ساتھ کئی رکاوٹوں کو دور کیا‘ انہوں نے کہا کہ حکومت اس بات سے بخوبی آگاہ ہے کہ فارماسیوٹیکل انڈسٹری کو کچھ علاقوں میں مسائل کا سامنا ہے لیکن ڈرگ ریگولیٹری اتھارٹی اور وزارت نیشنل ہیلتھ سروسز ان مسائل کو ترجیحی بنیادوں پر حل کرنے کیلئے پرعزم ہے