وفاقی دارالحکومت میں عید الفطر پر خوشگوار موسم سے شہر ی خوش

اسلام آباد۔20مارچ (اے پی پی):وفاقی دارالحکومت اسلام آباد میں درجہ حرارت میں حالیہ کمی اور ٹھنڈے موسم سے عید کی تقریبات کا آغاز ہو رہا ہے،رمضان المبارک کےدرمیانی ایام میں گرمی کے بعد سکون کا احساس اور عید تہوار کے ماحول میں خاص دلکشی کا اضافہ ہوا ہے۔ محکمہ موسمیات کے مطابق ملک میں داخل ہونے والے ایک مغربی موسمی نظام نے ملک کے بڑے حصوں کو متاثر کیا ہے، جس سے بارش کے ساتھ ساتھ مختلف مقامات پر بادل چھائے ہوئے ہیں اور درجہ حرارت میں خوش آئند کمی واقع ہوئی ہے۔یہ تبدیلی صرف اسلام آباد تک محدود نہیں رہی بلکہ ملک بھر میں ٹھنڈے موسم سے شہریوں کو بڑے پیمانے پر ریلیف مل رہا ہے۔

رواں سال کی عید الفطر پرانی یادوں کو تازہ کرنے اور رب تعالیٰ کی شکرگزاری کا موقع فراہم کرتی ہے کیونکہ حالیہ عید نسبتاً ٹھنڈے موسم میں آئی ہے جس نے لوگوں کے لیے معتدل موسم میں عید کو مزید پرلطف بنا دیا ہے۔ اسلام آباد بھر کے رہائشیوں نے اس تبدیلی کو راحت اور خوشی قرار دیا ہے۔ایف ۔7 میں ایک دکاندار محمد رفیق نے اے پی پی کے ساتھ خصوصی گفتگو کرتے ہوئے کہا کہ ہلکے خنک موسم نے عید کی تیاریوں کو مزید سہل بنا دیا ہے اور خوشگوار موسم کا احساس بھی اجاگر کیا ہے۔ اسی طرح جی ۔13 میں ایک گھریلو خاتون صبا نے اے پی پی کو بتایا کہ رمضان کی خصوصی دعاؤں کے ساتھ عید کی تیاریوں میں کہیں زیادہ آرام اور سکون حاصل ہوا ہے۔ انہوں نے خوشگوار موسم کو ایک نعمت قرار دیا۔

مساجد میں نمازیوں پرسکون اور ٹھنڈے موسمی حالات کا خیرمقدم کرتے ہوئے کہا ہے کہ عید اجتماعات اور نماز عید کی ادائیگی کے لیےموسم بہترین بن گیا ہے۔ وفاقی دارالحکومت کی مارکیٹوں بشمول آبپارہ، جی ۔ 11،آئی ۔10، کراچی کمپنی، جناح سپر اور دیگر تمام مارکیٹس میں بھی عید شاپنگ کی سرگرمیاں عروج پر ہیں اور صارفین پر مسرت موسم میں خریداری میں مصروف ہیں۔ تفریحی مقامات اور پبلک پارکس میں بھی سیاحتی اور تفریحی سرگرمیاں عروج پر ہیں اور عوام بارش کے بعد کے تازہ ماحول سے لطف اندوز ہورہے ہیں۔اسی طرح سوشل میڈیا بھی اجتماعی مزاج کی عکاسی کرتا ہے، صارفین عید الفطر پر نایاب ٹھنڈے موسم میں اپنی یادوں کو مزید یادگار بنا رہے ہیں۔واضح رہے کہ محکمہ موسمیات نے ملک بھر میں آئندہ چند دنوں تک موسم کی خوشگوار صورتحال برقرار رہنے کی توقع ظاہر کی ہے۔/395