وفاقی وزیر برائے منصوبہ بندی و ترقی احسن اقبال کا تقریب سے خطاب

پانامہ اور جے ٹی آئی سے پاکستان کا مستقبل نہیں بنے گا ‘ پاکستان کا مستقبل نوجوان نسل کو بہترین وسائل مہییا کرنے اور انہیں روشن مستقبل دینے سے بنے گا
وفاقی وزیر برائے منصوبہ بندی و ترقی احسن اقبال کا تقریب سے خطاب

اسلام آباد ۔ 07 جولائی (اے پی پی) وفاقی وزیر برائے منصوبہ بندی و ترقی احسن اقبال نے کہا ہے کہ پانامہ اور جے ٹی آئی سے پاکستان کا مستقبل نہیں بنے گا بلکہ پاکستان کا مستقبل نوجوان نسل کو بہترین وسائل مہییا کرنے اور انہیں روشن مستقبل دینے سے بنے گا۔ وفاقی وزیر احسن اقبال نے وزارت سائنس اینڈ ٹیکنالوجی کی جانب سے سائنس ٹینلنٹ فارمنگ سکیم کے تحت تین سو طلباءو طالبات کو لیپ ٹاپ تقسیم کی تقریب میں بطور مہمان خصوصی شرکت کی۔ تقریب میں طالبات سے بات چیت کرتے ہوئے احسن اقبال نے کہاکہ آج کا نوجوان ہیرو ہے، پاکستان کی روح ہے جو حالات کو شکست دے کر اپنے خوابوں کو حاصل کرنے کی جستجو میں لگا ہوا ہے۔ انہوں نے کہا آج انسانی تاریخ جس دور سے گزر رہی ہے اسے علم و تحقیق کا دور کہا جاتا ہے اور یہ تحقیق انسانی ترقی سے وابستہ ہے ، ہر گزرتا دن ایک نئی تحقیق اور نئی ایجادات سامنے لا رہا ہے اور دنیا کے ساتھ چلنے کےلئے پاکستانی نوجوان کو اس نئے دور کے ساتھ قدم سے قدم ملا کر چلنا ہے۔ انہوں نے کہا کہ وژن 2025ءوزیراعظم نواز شریف کا خواب ہے جس کی بدولت پاکستان کا شمار دنیا کی 25 بڑی معیشتوں میں ہوگا اور اگر پاکستان اسی رفتار سے ترقی کرتا رہا تو 2030ء تک پاکستان کا شمار دنیا کی 20 مضبوط معیشتوں میں ہو گا۔ انہوں نے کہا کہ ہمیں ملک میں ابن خلدون ،ابن بطوطہ ابن سینا پیدا کرنے ہوں گے کیونکہ ہم نے جب سوچنا اور تحقیق کرنا چھوڑ کر نقل مارنا شروع کی تو ہم پیچھے رہ گئے اور اگر ہم نے ٹیکنالوجی اور فورتھ انڈسٹریل ریولیشن لے کر آنا ہے تو سائنس اینڈ ٹیکنالوجی، تحقیق اور جدت پر توجہ دینی ہو گی۔