وفاقی وزیر خزانہ سینیٹر اسحاق ڈار سے ایشین انفراسٹرکچر انوسٹمنٹ بینک کے وفد کی ملاقات

اسلام آباد ۔ 11 ستمبر (اے پی پی) وفاقی وزیر خزانہ سینیٹر اسحاق ڈار سے ایشین انفراسٹرکچر انوسٹمنٹ بینک (اے آئی آئی بی) کے وفد نے وائس پریذیڈنٹ ڈی جے پاندیان کی قیادت میں ملاقات کی۔ اس موقع پر وفاقی وزیر نے کہا کہ پاکستان اے آئی آئی بی کے بانی ارکان میں شامل ہے اور پاکستان ایشیائی خطے میں موجودہ اداروں کی کوششوں کو تقویت دینے کے لئے مزید کثیر الجہتی ادارے کے قیام کے نظریئے کا حامی رہا ہے۔ انہوں نے ایم 4 گوجرہ ۔ شورکوٹ موٹر وے اور تربیلا V- ہائیڈرو پاور پراجیکٹ میں اے آئی آئی بی کی فنانسنگ کو سراہا اور کہا کہ یہ پاکستان اور اے آئی آئی بی کے تعاون کی اچھی شروعات ہیں۔ پاکستان بینک کے ساتھ مضبوط شراکت داری کا خواہاں ہے۔ اے آئی آئی بی کے نائب صدر نے کہا کہ پاکستان بینک کا ایک فعال رکن ہے اور اے آئی آئی بی کی جانب سے پہلی فنانسنگ کے لئے اس کا انتخاب کیا گیا ہے۔ انہوں نے کہا کہ اے آئی آئی بی کے بورڈ آف ڈائریکٹرز کے دورہ پاکستان سے فریقین کو مختلف معاملات پر تفصیل سے بات چیت کرنے کا موقع ملے گا۔ وزارت خزانہ کے سینئر حکام بھی اس موقع پر موجود تھے۔