وفاقی وزیر ریلوے خواجہ سعد رفیق کی صحافیوں سے گفتگو

اسلام آباد ۔ 07 جولائی (اے پی پی) وفاقی وزیر ریلوے خواجہ سعد رفیق نے قومی سلامتی کے ادارے کو جے آئی ٹی کا کنٹرول دینے سے متعلق خبر پر تاحال کسی بھی فریق کی وضاحت نہ آنے پر شدید تشویش کا اظہار کرتے ہوئے کہا ہے کہ اگر یہ خبر درست ہے تو پوری قوم وضاحت چاہتی ہے کہ جے آئی ٹی کا کنٹرول کسی تحریری عدالتی حکم پر کیا گیا ہے یا زبانی حکم کے تحت ایسا ہوا ہے‘بطور فریق ہمارا یہ حق ہے کہ ہمیں بتایا جائے کہ کس قانون کے تحت ایسا کیا گیا ہے ‘جے آئی ٹی کی جانب سے قطری شہزادے کو لکھے گئے خط کا متن بھی دھمکی آمیز ہے ‘ ‘قطری شہزادے کا قطر جا کر بیان لینے ‘ہماری اور پی ٹی آئی کی دستاویزات کی جانچ پڑتال کے بغیر اگر جے آئی ٹی کوئی رپورٹ سپریم کورٹ میں پیش کرتی ہے تو اسکی کوئی قانونی حیثیت اور ساکھ نہیں ہوگی اور نہ ہی وہ رپورٹ غیرجانبدارہوگی‘جے آئی ٹی کے اقدامات اور پراسراریت کے باعث ہر آنے والے دن ہمارا جے آئی ٹی پر اعتماد کمزور ہورہا ہے‘ہمیں بتایا جائے کہ کس قانون اور اتھارٹی کی اجازت سے وزیراعظم ہاﺅس کا فون ٹیپ کیا گیا‘ حکومت و ریاستی ادارے کوئی بھی آئین اور قانون سے بالاتر نہیں ‘ سب کو آئین اور قانون کے سائے تلے اپنی ذمہ داریاں سرانجام دینی ہیں‘ مسلم لیگ ن اور پیپلز پارٹی ملک کو 90 کی دہائی سے نکال کر لائے تھے آج عمران خان پاکستان کو واپس اسی 90 کی دہائی میں لے جانا چاہتے ہیں۔ وہ جمعہ کو اسلام آباد میں صحافیوں سے گفتگو کر رہے تھے۔