وفاقی وزیر محمد برجیس طاہر سے آزاد کشمیر کے قائم مقام وزیراعظم طارق فاروق کی ملاقات

وفاقی وزیر محمد برجیس طاہر سے آزاد کشمیر کے قائم مقام وزیراعظم طارق فاروق کی ملاقات مسئلہ کشمیر سمیت آزاد کشمیر اور پاکستان کے سیاسی و معاشی صورتحال پر تبادلہ خیال

اسلام آباد ۔ 10 جولائی (اے پی پی) وفاقی وزیر برائے امور کشمیر و گلگت بلتستان چوہدری محمد برجیس طاہر سے آزاد کشمیر کے قائم مقام وزیراعظم چوہدری طارق فاروق نے پیر کو یہاں ملاقات کی۔ ملاقات میں مسئلہ کشمیر سمیت آزاد کشمیر اور پاکستان کے سیاسی و معاشی صورتحال پر تبادلہ خیال کیا گیا۔ مقبوضہ کشمیر کے غیور اور بہادر کشمیری عوام کی جدوجہد کو خراج تحسین پیش کر تے ہوئے وفاقی وزیر نے کہا کہ برہان مظفر وانی کی جدجہد اور شہادت نے تحریک آزادی کشمیر میں نیا جوش و جذبہ پیدا کر دیا ہے اور کشمیر کا بچہ بچہ برہان مظفر وانی کے فلسفہ حیات سے متاثر ہو کر اس کو پایہ تکمیل تک پہنچانے کےلئے پرعزم ہے۔ انہوں نے کہا کہ وزیراعظم پاکستان محمد نواز شریف مسئلہ کشمیر سے متعلق بڑا واضح موقف رکھتے ہیں اور انہوں نے متعدد مواقع پر اس امر کا واضح اظہار کیا ہے کہ مسئلہ کشمیر کے حل کے بغیر بھارت سے تعلقات معمول پر نہیں آ سکتے۔ انہوں نے کہا کہ حکومت پاکستان اور پاکستان کے عوام اپنے کشمیری بھائیوں کے شانہ بشانہ کھڑئے ہیں اور مقبوضہ کشمیر میں بھارتی مظالم کو دنیا کے ہر فورم پر بے نقاب کیا جا رہا ہے تا کہ انسانی حقوق کی تنظیمیں مقبوضہ کشمیر میں بھارت کی جانب سے انسانیت سوز مظالم رکوانے کےلئے اپنا موثر کردار ادا کریں۔