وفاقی وزیر چوہدری محمد برجیس طاہر کا کشمیری نوجوان برہان مظفر وانی کو انکے یوم شہادت پر زبردست خراج تحسین

وفاقی وزیر چوہدری محمد برجیس طاہر کا کشمیری نوجوان برہان مظفر وانی کو انکے یوم شہادت پر زبردست خراج تحسین
برہان مظفر وانی کی جدوجہد نے تحریک آزادی کشمیر میں نئی روح پھونک دی ہے

اسلام آباد ۔ 07 جولائی (اے پی پی) وفاقی وزیر برائے اُمور کشمیر و گلگت بلتستان چوہدری محمد برجیس طاہر نے کشمیری نوجوان برہان مظفر وانی کی یوم شہادت کے موقع پر برہان وانی شہید کو زبردست خراج تحسین پیش کرتے ہوئے کہا ہے کہ برہان مظفر وانی کی جدوجہد نے تحریک آزادی کشمیر میں نئی روح پھونک دی ہے جس کے واضح اثرات آج پورے مقبوضہ کشمیر میں دیکھے جا سکتے ہیں، برہان وانی کی شہادت کے بعد ان کے مقصد حیات کا علم آج مقبوضہ کشمیر کے ہر فرد نے اٹھا لیا ہے اور مقبوضہ کشمیر کے ہر گلی کوچے میں بھارتی ناجائز تسلط کے خلاف مظاہرے کئے جا رہے ہیں، آج کشمیر کے نوجوان طلباءو طالبات برہان وانی کے مقصد حیات کی تکمیل کےلئے 8 لاکھ بھارتی قابض فوج کی گولیوں کا جواب پتھروں سے دے رہے ہیں، بھارتی حکومت اور فوج کی جانب سے ظالمانہ اور انسانیت سوز ہتھکنڈوں کے باوجود آج آزادی کے نعروں کی گونج بھارت میں نئی دہلی اور کلکتہ کی جامعات تک جا پہنچی ہے اور حق خودارادیت کی اس تحریک میں ہر گزرتے دن کا ساتھ اورزیادہ شدت آرہی ہے۔ برہان مظفر وانی کے یوم شہادت پر اپنے پیغام میں وفاقی وزیر نے کہا کہ حقوق کی کسی بھی جدوجہد میں اُس وقت کامیابی یقینی ہو جاتی ہے جب اُس میں اُس قوم کی مڈل کلاس اور پڑھے لکھے طبقے کی شمولیت ہو جائے۔