وینزویلا نے امریکی فوجی خطرات کے پیشِ نظر دفاعی مشقوں کا آغاز کر دیا

کراکس۔19اکتوبر (اے پی پی):وینزویلا نے امریکی فوجی خطرات کے پیشِ نظر دفاعی مشقوں کا آغاز کر دیا۔شنہوا کے مطا بق وینزویلا کے صدر نکولس مادورو نے ہفتہ کے روز اعلان کیا ہے کہ ملک نے "آزادی 200” آپریشن کے تحت "وینزویلی میدان کا عظیم راہداری” کے نام سے دفاعی مشقوں کا آغاز کر دیا ہے، جو کہ امریکی فوجی خطرات کے تناظر میں قومی دفاع کو مضبوط بنانے کے لیے کی جا رہی ہیں۔

یہ مشقیں ہفتے کی صبح مرکزی ریاستوں باریناس، پورٹوگيسا، کوخدیس اور گواریکو میں شروع کی گئیں، جن کا مقصد ممکنہ بیرونی حملوں کے خلاف ملک کی تیاری کو بہتر بنانا ہے۔صدر مادورو نے سوشل میڈیا پر جاری اپنے پیغام میں کہا کہ ملک بھر کے تمام مربوط دفاعی زونز اب فعال اور عملی حالت میں آ چکے ہیں۔

ہم نے 27 بنیادی دفاعی ذمہ داریاں مکمل کر لی ہیں۔انہوں نے شہری، پولیس اور فوجی شعبوں کے درمیان ہم آہنگی کو "ایک مکمل اور منظم اتحاد” قرار دیا، جو ملکی خودمختاری اور اندرونی استحکام کو یقینی بنانے کے لیے ناگزیر ہے۔انہوں نے مزید کہاکہ ہم امن کے راستے پر چلتے ہوئے مسلسل کامیابیاں حاصل کرنا چاہتے ہیں۔

انہوں نے دعویٰ کیا کہ امریکہ کی جانب سے کیریبین میں وینزویلا کی سمندری حدود کے قریب فوجی سرگرمیوں میں اضافہ ہو رہا ہے، جس کے پیشِ نظر یہ اقدامات ضروری ہو گئے ہیں۔صدر کے مطابق، یہ مشقیں نہ صرف افواج کی تیاری کے اعلیٰ معیار کو یقینی بنائیں گی بلکہ عوامی شمولیت اور علاقائی تعاون کے ذریعے قومی دفاع کے نظام کو مزید مستحکم کریں گی۔