ٹور میچ، پاکستان نے آسٹریلیا اے کے خلاف تین روزہ میچ کی پہلی اننگز میں 3 وکٹوں پر 336 رنز بنا لئے، بابراعظم 157 اور اسد شفیق 119 رنز بنا کر ناقابل شکست

پرتھ ۔ 11 نومبر (اے پی پی) پاکستان نے آسٹریلیا اے کے خلاف تین روزہ ٹور میچ کے پہلے روز کھیل ختم ہونے تک اپنی پہلی اننگز میں 3 وکٹوں کے نقصان پر 336 رنز بنا لئے، 60 رنز پر 3 وکٹیں گرنے کے بعد بابر اعظم اور اسد شفیق حریف باﺅلرز کے سامنے ڈٹ گئے، دونوں بلے بازوں نے مشکل وقت میں انتہائی شاندار اور ذمہ دارانہ بیٹنگ کا مظاہرہ کرتے ہوئے چوتھی وکٹ کی شراکت میں 276 ناقابل شکست رنز جوڑ کر ٹیم کی پوزیشن مستحکم کی، بابر اعظم 157 اور اسدشفیق 119 رنز کے ساتھ وکٹ پر موجود ہیں۔ پیر کو پرتھ میں شروع ہونے والے تین روزہ ٹور میچ کے پہلے روز پاکستانی ٹیم نے پہلی اننگز شروع کی تو اس کا آغاز کچھ زیادہ اچھا نہ تھا اور 60 کے سکور پر اس کے ابتدائی تین کھلاڑی آﺅٹ ہو کر پویلین لوٹ گئے، شان مسعود 22، کپتان اظہر علی 11 اور حارث سہیل 18 رنز بنا کر آﺅٹ ہوئے، اس موقع پر بابر اعظم اور اسد شفیق نے میدان سنبھالا، دونوں بلے بازوں نے ڈٹ کر حریف باﺅلرز کا مقابلہ کیا اور دن ختم ہونے تک مزید کوئی نقصان نہ ہونے دیا، اسطرح پہلے روز جب کھیل ختم ہوا تو پاکستان نے پہلی اننگز میں 3 وکٹوں پر 336 رنز بنا لئے تھے، بابر اعظم 157 اور اسد شفیق 119 رنز کے ساتھ ناقابل شکست ہیں۔ریلی مریڈتھ نے 2 اور مائیکل نیسر نے ایک وکٹ لی۔