پاکستان رومانیہ کے ذریعہ یورپی منڈیوں تک رسائی حاصل کر سکتا ہے ، سفیر رومانیہ

اسلام آباد۔22جنوری (اے پی پی):رومانیہ کے سفیر ڈین سٹوئینسکو نے کہا ہے کہ رومانیہ کی بندرگاہ کانسٹانٹا پاکستان اور یورپ کے درمیان ایک اہم میری ٹائم گیٹ وے کے طور پر کام کر سکتی ہے جس سے یورپی یونین کو دو طرفہ تجارت اور پاکستانی برآمدات میں نمایاں اضافہ ہو گا۔ انہوں نے یہ بات جمعرات کو اسلام آباد چیمبر آف کامرس اینڈ انڈسٹری (آئی سی سی آئی) میں ایک انٹرایکٹو سیشن کے دوران کہی۔ انہوں نے بتایا کہ کراچی پورٹ حکام کے ساتھ دونوں بندرگاہوں کے درمیان مفاہمت کی یادداشت پر دستخط کرنے کے لیے بات چیت آخری مراحل میں ہے جس سے سمندری روابط قائم کرنے اور پاکستانی برآمد کنندگان کو مضبوط قوت خرید کے ساتھ 450 ملین سے زائد صارفین کی یورپی یونین کی مارکیٹ تک رسائی فراہم کرنے میں مدد ملے گی۔

ڈپٹی ہیڈ آف مشن ایڈورڈ رابرٹ پریڈا بھی سفیر کے ہمراہ تھے۔سفیر نے کہا کہ رومانیہ یورپ میں تیزی سے ترقی کرنے والی معیشتوں میں سے ایک ہے اور اپنے تزویراتی جغرافیائی محل وقوع کی وجہ سے دوطرفہ تجارت اور سرمایہ کاری کو وسعت دینے کے بے پناہ مواقع فراہم کرتا ہے۔ انہوں نے رومانیہ کو وسطی اور مشرقی یورپ کا گیٹ وے قرار دیتے ہوئے مزید کہا کہ دونوں ممالک کے درمیان قریبی تعاون سے ٹھوس اقتصادی فوائد حاصل ہو سکتے ہیں۔انہوں نے دونوں ممالک کے ٹیکنالوجی کے شعبوں کے درمیان ڈیجیٹل تعاون، مشترکہ منصوبوں، اختراعات اور علم کے تبادلے کو فروغ دینے کے لیے رومانیہ-پاکستان آئی ٹی فورم کی اہمیت پر زور دیا۔ ایک تفصیلی پریزنٹیشن کے ذریعے انہوں نے رومانیہ کی تجارت اور سرمایہ کاری کے امکانات کو بھی اجاگر کیا اور پاکستانی کاروباریوں کی حوصلہ افزائی کی کہ وہ رومانیہ کے چیمبرز آف کامرس اور کاروباری انجمنوں کے ساتھ روابط مضبوط کریں۔

انہوں نے رومانیہ کے سفارت خانے کی جانب سے مکمل سہولت فراہم کرنے کی یقین دہانی کرائی۔انہوں نے یاد دلایا کہ رومانیہ اور پاکستان کے درمیان ساٹھ سال پر محیط گہرے تعلقات ہیں۔ انہوں نے کہا کہ رومانیہ کے کارکنوں اور کمپنیوں نے 1970ء کی دہائی میں پاکستان کی صنعتی بنیاد قائم کرنے میں اہم کردار ادا کیا۔ انہوں نے کہا کہ رومانیہ نے پاکستان کے آئل ریفائننگ انفراسٹرکچر بالخصوص نیشنل آئل ریفائنری (این آر ایل) کی ترقی میں بڑے پیمانے پر تعاون کیا ہے۔قبل ازیں اپنے خطبہ استقبالیہ میں آئی سی سی آئی کے صدر سردار طاہر محمود نے کہا کہ موجودہ دو طرفہ تجارتی حجم پاکستان رومانیہ تعلقات کی حقیقی صلاحیت کی عکاسی نہیں کرتا۔ انہوں نے سالانہ دوطرفہ تجارت کو کم از کم 500 ملین امریکی ڈالر تک بڑھانے کے لیے مشترکہ کوششوں کی ضرورت پر زور دیا۔

پاکستان کی برآمدی طاقتوں پر روشنی ڈالتے ہوئے انہوں نے کہا کہ ٹیکسٹائل اور ملبوسات رومانیہ اور اس کے ذریعے وسیع یورپی یونین میں مضبوط منڈیاں تلاش کر سکتے ہیں۔ انہوں نے مشترکہ منصوبوں خاص طور پر جدید مینوفیکچرنگ اور صحت کی دیکھ بھال کی مصنوعات میں مواقع پر بھی زور دیا۔انہوں نے اس بات کا اعادہ کیا کہ آئی سی سی آئی کاروباری روابط کو آسان بنانے، سیکٹر فوکسڈ وفود کو منظم کرنے کے لیے تیار ہے جہاں دونوں اطراف کے کاروباری ادارے طویل مدتی، منافع بخش شراکت داری کو فروغ دے سکیں۔آئی سی سی آئی کے سینئر نائب صدر سردار طاہر ایوب نے اس اعتماد کا اظہار کیا کہ سفیر کا دورہ دونوں ممالک کو قریب لانے اور باہمی تجارت اور سرمایہ کاری کی نئی راہیں کھولنے میں مددگار ثابت ہو گا۔

چیئرمین آئی سی سی آئی ڈپلومیٹک کمیٹی ظفر بختاوری، آئی سی سی آئی کے صدر کے مشیر نعیم صدیقی اور مختلف شعبوں سے تعلق رکھنے والی خواتین کاروباری شخصیات سمیت بڑی تعداد میں شخصیات نے سوال و جواب کے سیشن میں بڑھ چڑھ کر حصہ لیا۔اس موقع پر نائب صدر عرفان چوہدری، ایگزیکٹو ممبران میاں شوکت مسعود، ذوالقرنین عباسی، عمران منہاس، وسیم چوہدری، اسحاق سیال، راجہ نوید ستی، ملک عبدالعزیز اور دیگر بھی موجود تھے۔