پاکستان سپر لیگ کی تاریخ میں پہلی بار شائقین پورے ٹورنامنٹ میں مکمل میچ کی اردو کمنٹری سے لطف اندوز ہو سکیں گے

راولپنڈی۔10اپریل (اے پی پی):پاکستان سپر لیگ کی تاریخ میں پہلی بار شائقین پورے ٹورنامنٹ میں مکمل میچ کی اردو کمنٹری سے لطف اندوز ہو سکیں گے۔ پی ایس ایل کے چیف ایگزیکٹو آفیسر سلمان نصیر کا کہنا ہے کہ یہ پی ایس ایل اور اس کے بڑھتے ہوئے مداحوں کے لیے ایک تاریخی لمحہ ہے۔

پاکستان میں کرکٹ ایک متحد قوت ہے اور پورے کھیل کے لیے اردو میں کمنٹری پیش کر کے ہم پی ایس ایل کے جوش اور توانائی کو ملک کے کونے کونے میں شائقین کے دلوں کے قریب لا رہے ہیں۔ انہوں نے کہا اردو کمنٹری فیڈ کا سب کو بے صبری سے انتظار تھا اور ہم اسے فراہم کرنے کے لیے ُپرجوش ہیں۔

یہ اقدام نہ صرف کمیونٹی کے ساتھ ہمارا تعلق مضبوط کرتا ہے بلکہ اس بات کو بھی یقینی بناتا ہے کہ پی ایس ایل کا جوش و خروش وسیع تر سامعین کے لیے زیادہ قابل رسائی ہے۔ پی سی بی کا کہنا ہے کہ پورے ٹورنامنٹ میں شائقین اردو میں براہ راست نشریات دیکھ سکیں گے جس سے وہ پاکستان کی قومی زبان میں لیگ میچوں کے ایکشن اور جوش و خروش سے لطف اندوز ہو سکیں گے۔

یہ قدم ان لاکھوں کرکٹ شائقین کے ساتھ تعلق کو مزید گہرا کرنے کا موقع فراہم کرے گا جو طویل عرصے سے اس اضافے کا انتظار کر رہے تھے۔ واضح رہے کہ پی ایس ایل کا دسواں ایڈیشن (کل) بروز جمعہ سے راولپنڈی میں شروع ہو گا۔