پاکستان نیشنل کمیشن برائے یونیسکو اور فریڈم گیٹ پراسپیریٹی نے مفاہمت کی یاداشت پر دستخط کردیئے

اسلام آباد۔7فروری (اے پی پی):پاکستان نیشنل کمیشن برائے یونیسکو اور فریڈم گیٹ پراسپیریٹی نے مفاہمت کی یاداشت پر دستخط کیے ہیں تاکہ پاکستان میں یونیسکو کے ہم آہنگ ترجیحات کو آگے بڑھانے کے لیے ایک سٹریٹجک تعاون کا فریم ورک قائم کیا جائے۔

ان ترجیحات میں تعلیم، موسمیاتی تبدیلی، نوجوانوں کی ترقی، ڈیجیٹل، ثقافت اور علم پر مبنی شراکت داری شامل ہیں۔مفاہمت کی اس یاداشت پر اسلام آباد میں باقاعدہ طور پر دستخط کیے گئے، جہاں پاکستان نیشنل کمیشن برائے یونیسکو کے سیکرٹری جنرل آفتاب محمد خان اور فریڈم گیٹ پراسپیریٹی کے چیف ایگزیکٹو آفیسر محمد انور نے دستخط کیے۔

یہ شراکت داری مشترکہ اقدامات اور مربوط پروگرامنگ کے ذریعے جامع ترقی، پائیدار طریقوں اور علم پر مبنی سماجی تبدیلی کو فروغ دینے کا مقصد رکھتی ہے۔دستخط کی تقریب میں دونوں اداروں کے افسران اور ٹیم ممبران شریک ہوئے۔

پی این سی یو کےراجہ عمران الحق جبکہ فریڈم گیٹ پراسپیریٹی کے وفد میں صابرینہ شہزاد درانی، ڈاکٹر شہباز طارق اور دیگر ٹیم ممبران شامل تھے۔اس معاہدے کے تحت دونوں ادارے پائیدار ترقی کے لیے تعلیم، عالمی شہریت کی تعلیم، موسمیاتی لچک اور سبز معیشتوں، نوجوانوں کی کاروباری صلاحیت، میڈیا اور انفارمیشن لٹریسی، اور کمیونٹی پر مبنی جدت کے پروگراموں پر تعاون کریں گے۔

تقریب سے خطاب کرتے ہوئے آفتاب محمد خان نے کہا کہ یہ تعاون پی این سی یوکے قابل اعتماد سول سوسائٹی اداروں کے ساتھ شراکت داری کو مضبوط کرنے کے عزم کی عکاسی کرتا ہے تاکہ قومی ترقی کی ترجیحات اور عالمی تعلیم و پائیداری کے ایجنڈوں کو آگے بڑھایا جا سکے۔

محمد انور نے کہا کہ یہ شراکت داری گراؤنڈ لیول اقدامات اور بین الاقوامی ترقیاتی معیارات کے درمیان بہتر ہم آہنگی پیدا کرے گی، جس سے معیاری تعلیم تک رسائی بڑھے گی، موسمیاتی آگاہی کو فروغ ملے گا، اور نوجوانوں اور خواتین کو مستقبل کے لیے موزوں مہارتوں سے بااختیار بنایا جائے گا۔

انہوں نے نتیجہ اخذ کیا کہ یہ مفاہمتی یادداشت تعاون کے لیے ایک غیر خصوصی فریم ورک فراہم کرتا ہے اور دونوں اداروں کو مشترکہ طور پر وسائل جمع کرنے، پائلٹ اقدامات ڈیزائن کرنے، قومی مکالمے منعقد کرنے اور باہمی اتفاق سے طے شدہ ورک پلانز کے ذریعے پروگرام نافذ کرنے کی اجازت دیتا ہے۔