پولیو کے خلاف جاری جنگ میں حتمی ہدف کے حصول تک چین سے نہیں بیٹھ سکتے، سینیٹر عائشہ رضا فاروق

اسلام آباد ۔ 09 جولائی (اے پی پی) وزیر اعظم کی ترجمان برائے پولیو تدارک کا پروگرام، سینیٹر عائشہ رضا فاروق نے کہا ہے کہ پولیو کے خلاف جاری جنگ میں حتمی ہدف کے حصول یعنی پولیو کیسز کی تعداد کو مستقل صفر کے ہندسے پر قائم رکھنے تک ہم چین سے نہیں بیٹھ سکتے۔ فیلڈ ایپی ڈیمیولوجی لیبارٹری ٹریننگ پروگرام (ایف ای ایل ٹی پی) کے دسویں سالانہ جائزہ و تربیتی 4 روزہ اجلاس کی اختتامی تقریب سے خطاب کرتے ہوئے سینیٹر عائشہ رضا فاروق نے پاکستان میں اس پروگرام کو 6 سال کے عرصے میں انتہائی لگن اور کامیابی سے مکمل کرنے پر پروگرام سے وابستہ حکام کو مبارکباد پیش کی۔ ان کا کہنا تھا کہ این – سٹاپ سے وابستہ افسران ضلعی سطح پر اس پروگرام کو تکنیکی بنیادوں پر تعاون فراہم کر رہے ہیں جو مطلوبہ اہداف کے حصول میں کلیدی کردار ادا کر سکتے ہیں۔ انہوں نے کہا کہ این – سٹاپ سے وابستہ انسانی خدمت کے جذبے سے سر شار اراکین تاریخ رقم کرتے ہوئے انتہائی لگن، محنت اور تکنینکی بینادوں پر فراہم کردہ رہنما اصولوں کی مدد سے پولیو کے موذی وائرس کے کرہ ارض سے مستقل خاتمے کو یقینی بنانے میں کوشاں ہیں۔ انہوں نے یقین دلایا کہ حکومتِ پاکستان اس پروگرام کو کامیاب بنانے میں ہر ممکن تعاون فراہم کرے گی جبکہ انہوں نے اس امید کا بھی ا ظہار کیا کہ بین الاقوامی مالیاتی اور تربیتی تعاون کا ادارہ سی ڈی سی اٹلانٹا آئندہ آنے والے مہنیوں اور سالوں میں مذکورہ پروگرام سے وابستہ ان افسران کے ساتھ تعاون کے فروغ میں اپنا کردار ادا کرتا رہے گا۔ انہوں نے گذشتہ چند روز کے دوران پروگرام میں مزید بہتری لانے کے حوالے سے ان افسران کی کارکرد گی کو انتہائی بے تکلفانہ انداز میں سراہا اور انہیں مبارکباد پیش کی۔