پی ایم ڈی سی کی میڈیکل ،ڈینٹل پریکٹیشنرز ،سپیشلسٹس کو اپنے رجسٹریشن سرٹیفکیٹس کی تجدید کرانے کی ہدایت

اسلام آباد۔24اگست (اے پی پی):پاکستان میڈیکل اینڈ ڈینٹل کونسل (پی ایم ڈی سی) نے تمام میڈیکل اور ڈینٹل پریکٹیشنرز اور سپیشلسٹس کو ہدایت کی ہے کہ وہ پی ایم ڈی سی ایکٹ 2022 اور متعلقہ قواعد و ضوابط کے مطابق اپنے رجسٹریشن سرٹیفکیٹس کی تجدید کرائیں۔جاری بیان کے مطابق تمام ڈاکٹروں کو ہدایت کی گئی ہے کہ وہ اپنے رجسٹریشن سرٹیفکیٹس کی تجدید چھ ماہ کے اندر مکمل کریں تاکہ قانونی، پیشہ ورانہ، حفاظتی اور اخلاقی تقاضوں کی مسلسل پابندی یقینی بنائی جا سکے اور انہیں مستقبل میں کسی قسم کی دشواری کا سامنا نہ کرنا پڑے۔اس اقدام کا مقصد پروفیشنل رجسٹر کو اپ ڈیٹ اور درست رکھنا اور ڈاکٹروں کے ساتھ ساتھ عوام کے مفادات کا تحفظ کرنا ہے۔ ایک موجودہ اور قابلِ تصدیق رجسٹر صحت کے نظام پر عوام کے اعتماد کو برقرار رکھنے کے لیے بنیادی اہمیت رکھتا ہے۔پی ایم اینڈ ڈی سی نے یہ اقدام بنیادی طور پر ڈاکٹروں کے تحفظ، مریضوں کی حفاظت اور میڈیکل و ڈینٹل شعبے کی ساکھ اور سالمیت کو مضبوط بنانے کے لیے اٹھایا ہے۔ لائسنس یافتہ اور رجسٹرڈ پریکٹیشنرز کا درست اور تازہ ترین ریکارڈ برقرار رکھنا ایک اہم قانونی و ریگولیٹری ذمہ داری ہے، تاکہ صرف باقاعدہ طور پر رجسٹرڈ اور مجاز افراد ہی طبی اور ڈینٹل خدمات انجام دے سکیں۔مزید برآں، رجسٹریشن کی تجدید کا عمل اتائی پن (Quackery)، جعل سازی، رجسٹریشن سرٹیفکیٹس کے فراڈ پر مبنی استعمال اور غیر مجاز طبی پریکٹس سے متعلق خدشات سے نمٹنے میں بھی معاون ثابت ہوگا۔ ایک جدید اور مستند رجسٹریشن ڈیٹا بیس ایسے افراد کے لیے پیشہ ورانہ اسناد کا غلط استعمال یا خود کو کسی رجسٹرڈ ڈاکٹر کے طور پر ظاہر کرنا مزید مشکل بنا دے گا۔ رجسٹریشن ریکارڈ کی باقاعدہ تجدید اور تصدیق وفات پا جانے والے ڈاکٹروں کے رجسٹریشن سرٹیفکیٹس یا پیشہ ورانہ اسناد کے غلط استعمال کے خلاف بھی ایک اضافی حفاظتی اقدام فراہم کرے گی۔ رجسٹر کو مسلسل اپ ڈیٹ رکھنے سے کونسل کو پرانے یا غیر فعال ریکارڈز کی نشاندہی کرنے اور ضرورت کے مطابق مناسب ریگولیٹری کارروائی کرنے میں مدد ملے گی۔پی ایم اینڈ ڈی سی نے اس بات پر زور دیا ہے کہ درست اور مؤثر رجسٹریشن برقرار رکھنا ہر ڈاکٹر کی پیشہ ورانہ اور اخلاقی ذمہ داری ہے۔ رجسٹریشن کی باقاعدہ تجدید سے ڈاکٹروں کو ریگولیٹری تقاضوں کی پابندی برقرار رکھنے میں مدد ملتی ہے اور ان کی پیشہ ورانہ حیثیت کا قابلِ تصدیق ثبوت فراہم ہوتا ہے۔ اس کے نتیجے میں ڈاکٹروں کو پاکستان میں پیشہ ورانہ مواقع کے ساتھ ساتھ بیرونِ ملک ملازمت، پوسٹ گریجویٹ تربیت، لائسنسنگ اور دیگر پیشہ ورانہ مواقع حاصل کرنے میں بھی سہولت مل سکتی ہے۔پی ایم اینڈ ڈی سی تمام ڈاکٹروں اور ڈینٹسٹس، بالخصوص ان افراد جن کی رجسٹریشن کی تجدید طویل عرصے سے زیرِ التوا ہے، سے اپیل کرتی ہے کہ وہ مقررہ چھ ماہ کی مدت سے بھرپور فائدہ اٹھاتے ہوئے اپنی رجسٹریشن کی تجدید جلد از جلد مکمل کریں۔ کونسل نے تمام پریکٹیشنرز کو مشورہ دیا ہے کہ وہ چھ ماہ کی مدت ختم ہونے کا انتظار نہ کریں بلکہ بروقت اپنی رجسٹریشن کی تجدید یقینی بنائیں۔