پی ٹی ڈی سی کا نوجوانوں کے لیے قومی موبائل ٹریول ویڈیوگرافی مقابلہ، سیاحت کے ڈیجیٹل سفیر تیار کرنے کا عزم

اسلام آباد۔13جون (اے پی پی):پاکستان ٹورازم ڈویلپمنٹ کارپوریشن (پی ٹی ڈی سی) نے ویوو پاکستان، پاکستان نیشنل کونسل آف دی آرٹس (پی این سی اے) اور مشعل پاکستان کے اشتراک سے قومی یوتھ موبائل ٹریول اینڈ ٹورازم ویڈیوگرافی مقابلہ 2026 کے تحت موبائل جرنلزم ، ڈیجیٹل کہانی نویسی اور دستاویزی فلم سازی پر مشتمل ایک روزہ تربیتی ورکشاپ کا انعقاد کیا۔اس تربیت میں پاکستان بھر سے تعلق رکھنے والے 60 نوجوان شرکاء نے حصہ لیا، جنہیں اسمارٹ فونز کے ذریعے مؤثر اور معیاری سیاحتی مواد تخلیق کرنے کے لیے عملی مہارتیں اور معلومات فراہم کی گئیں۔ اس اقدام کا مقصد ابھرتے ہوئے کہانی نویسوں کو بااختیار بنانا ہے تاکہ وہ جدید ڈیجیٹل میڈیا کے ذریعے پاکستان کے بھرپور ثقافتی ورثے، تاریخی مقامات، سیاحتی ڈھانچے، قدرتی حسن اور انسانی دلچسپی پر مبنی کہانیوں کو مؤثر انداز میں دستاویزی شکل دے سکیں اور انہیں فروغ دے سکیں۔پاکستان نیشنل کونسل آف دی آرٹس (پی این سی اے)اسلام آباد میں منعقدہ اس ورکشاپ میں ماہرین کی رہنمائی کے ساتھ عملی تربیت بھی شامل تھی۔

شرکاء کو موبائل دستاویزی فلم سازی کے بنیادی اصولوں سے روشناس کرایا گیاجن میں موضوع کے انتخاب اور تاریخی تحقیق، ورثے کی دستاویز سازی کے لیے موبائل سینماٹوگرافی، اخلاقی سیاحت کے اصول، آواز کی ریکارڈنگ اور انٹرویو تکنیک، مختصر دستاویزی فلموں کی تدوین، وائس اوور کی تیاری،موسیقی کا مؤثر استعمال اور ڈیجیٹل پلیٹ فارمز کے لیے مواد کی بہتر پیشکش شامل تھے۔تربیتی نصاب ڈیجیٹل مواد تخلیق کرنےوالے ماہرین نے تیار اور پیش کیا جنہوں نے میڈیا کی ترقی، ڈیجیٹل کہانی نویسی، صحافتی تربیت اور اسٹریٹجک مواصلات میں اپنے وسیع تجربے سے استفادہ کیا۔ ورکشاپ میں نظریاتی تعلیم اور عملی مظاہروں کو یکجا کیا گیاجس سے شرکاء نے یہ سیکھا کہ جدید موبائل ٹیکنالوجی کے ذریعے مؤثر سیاحتی کہانیاں کیسے تخلیق کی جا سکتی ہیں۔اس تربیت کامقصد شرکاء کو وہ تکنیکی اور تخلیقی مہارتیں فراہم کرنا تھا جو اعلیٰ معیار کا ڈیجیٹل مواد تیار کرنے کے لیے ضروری ہیں، تاکہ پاکستان کے سیاحتی مقامات کوملکی اور بین الاقوامی سطح پر مؤثر انداز میں فروغ دیا جا سکے۔اس دوران مستند کہانی نویسی، ذمہ دارانہ سیاحتی ابلاغ اورپاکستان کے عوام، ثقافت، تاریخ، قدرتی مناظر اور سیاحوں کےتجربات کو اجاگر کرنے کے لیے ڈیجیٹل پلیٹ فارمز کے استعمال پر خصوصی توجہ دی گئی۔

اس موقع پر خطاب کرتے ہوئے پی ٹی ڈی سی کے منیجنگ ڈائریکٹر آفتاب الرحمٰن رانا نے کہا کہ ہر مقام کی اپنی ایک کہانی ہوتی ہے اور ہر کہانی میں ایک سفر کی تحریک پیدا کرنے کی طاقت موجود ہوتی ہے۔ قومی یوتھ موبائل ٹریول اینڈ ٹورازم ویڈیوگرافی مقابلے کے ذریعے پی ٹی ڈی سی کہانی نویسوں کی ایک نئی نسل میں سرمایہ کاری کر رہا ہےجو دنیا کے سامنے پاکستان کی نئی اور مثبت تصویر پیش کرے گی۔ تخلیقی صلاحیتوں، ٹیکنالوجی اور سیاحت کو یکجا کر کے ہم نوجوانوں کے لیے ایسے مواقع پیدا کر رہے ہیں کہ وہ پاکستان کے ثقافتی ورثے، ثقافت اور قدرتی حسن کے سفیر بن سکیں۔انہوں نے پاکستان کے خوبصورت قدرتی مناظر اور بھرپور ثقافتی ورثے کے تحفظ کے لیے ذمہ دارانہ سیاحت کے فروغ کی اہمیت پر بھی زور دیا۔انہوں نے کہا کہ مستقبل میں سیاحت کے فروغ کا انحصار بڑھتی ہوئی حد تک مستند ڈیجیٹل مواد اور عوامی سطح پر کہانیوں کے تبادلے پر ہوگا۔

انہوں نے اس بات پر زور دیا کہ نوجوان تخلیق کاروں کو جدید مواد سازی کی مہارتوں سے آراستہ کرنا نہ صرف سیاحتی مقامات کی تشہیر میں مددگار ہوگا بلکہ ملک کے اندر اور بیرونِ ملک پاکستان کی مثبت اور درست تصویر اجاگر کرنے میں بھی اہم کردار ادا کرے گا۔پی ٹی ڈی سی کے نمائندوں نے اس بات پر روشنی ڈالی کہ موبائل جرنلزم نے مواد سازی کو عام افراد کی دسترس میں لا کر اسے جمہوری شکل دے دی ہے، جس کے ذریعے ہر شخص جدید اور آسان ٹیکنالوجی کی مدد سے مؤثر کہانیاں بیان کر سکتا ہے۔انہوں نے کہا کہ نوجوان موادتخلیق کرنے والے پاکستان کی متنوع سیاحتی کشش کو اجاگر کرنے اور ڈیجیٹل پلیٹ فارمز کے ذریعے نئے ناظرین تک پہنچانے میں اہم کردار ادا کر سکتے ہیں۔

مقابلے کے دوسرے روز شرکاء ایک عملی فیلڈ اسائنمنٹ میں حصہ لیں گے، جس کے دوران وہ منتخب سیاحتی اور ثقافتی ورثے کے مقامات کا دورہ کریں گے اور صرف اپنے اسمارٹ فونز کی مدد سے سوشل میڈیا ریلز اور مختصر دستاویزی فلمیں تیار کریں گے۔ اس سرگرمی سے انہیں حقیقی ماحول میں اپنی حاصل کردہ مہارتوں کو استعمال کرنے اور سیاحت پر مبنی منفرد مواد تیار کرنے کا موقع ملے گا۔مقابلے کےدوران تیار کی گئی دستاویزی فلموں اور ڈیجیٹل مواد کا جائزہ سیاحت، میڈیا، فلم سازی اور ڈیجیٹل مواصلات کے شعبوں سے تعلق رکھنے والے آزاد ماہرین کے ایک پینل کے ذریعے لیا جائے گا۔ تخلیقی صلاحیت، کہانی نویسی کے معیار، تکنیکی مہارت، انفرادیت اور سیاحت کے فروغ کی صلاحیت کی بنیاد پر بہترین کارکردگی دکھانے والے شرکاء کا انتخاب کیا جائے گا۔

کورس کے بہترین 20 شرکاء کو پی ٹی ڈی سی کی جانب سے مکمل طور پر اسپانسر کردہ شمالی علاقہ جات پاکستان کی سات روزہ دستاویزی اور کہانی نویسی مہم میں شرکت کا موقع دیا جائے گا، جہاں وہ ملک کے چند خوبصورت ترین اور ثقافتی اعتبار سے اہم مقامات کی دستاویز سازی کریں گے۔مزید برآں، پہلی تین پوزیشنیں حاصل کرنے والے شرکاء کو ویوو کے جدید ترین اسمارٹ فونز انعام کے طور پر دیے جائیں گے تاکہ وہ موبائل فوٹوگرافی، ویڈیوگرافی اور ڈیجیٹل کہانی نویسی کے شعبوں میں اپنی صلاحیتوں کو مزید نکھار سکیں۔پی ٹی ڈی سی کو توقع ہے کہ یہ اقدام ہنر مند نوجوان کہانی نویسوں کا ایک ایسا نیٹ ورک تشکیل دے گا جو اعلیٰ معیار کا سیاحتی مواد تیار کر سکے،سیاحتی مقامات کی مارکیٹنگ کو مضبوط بنائے، ذمہ دارانہ سیاحت کے فروغ میں معاون ثابت ہو اور پاکستان کے ثقافتی و قدرتی ورثے کے بارے میں آگاہی میں اضافہ کرے۔

یہ پروگرام نوجوان پاکستانیوں میں جدت، تخلیقی صلاحیت اور ڈیجیٹل کاروباری رجحانات کو فروغ دینے کے ساتھ ساتھ سیاحت کے شعبے کی طویل مدتی ترقی میں بھی کردار ادا کرے گا۔قومی یوتھ موبائل ٹریول اینڈ ٹورازم ویڈیوگرافی مقابلہ پی ٹی ڈی سی، ویوو پاکستان، پی این سی اے اور مشعل پاکستان کے نوجوانوں کو بااختیار بنانے، مہارتوں کی ترقی، جدت طرازی اور سیاحتی مقامات کی مارکیٹنگ کے مشترکہ عزم کی عکاسی کرتا ہے۔ تربیت، عملی تجربات، رہنمائی اور مقابلے کو یکجا کرتے ہوئے اس اقدام کا مقصد سیاحت کے ایسے سفیروں کی نئی نسل تیار کرنا ہے جو پاکستان کی سیاحتی ترقی اور عالمی تشخص کو بہتر بنانے میں مؤثر کردار ادا کر سکیں۔

پاکستان ٹورازم ڈویلپمنٹ کارپوریشن ملک کا قومی سیاحتی ادارہ ہے جسے پاکستان بھر میں سیاحت کے فروغ اور سہولت کاری کی ذمہ داری سونپی گئی ہے۔اسٹریٹجک شراکت داریوں،سیاحتی مقامات کی ترقی کے منصوبوں اور جدید مارکیٹنگ پروگراموں کے ذریعے پی ٹی ڈی سی پاکستان کے ثقافتی ورثے، تاریخی مقامات اور قدرتی حسن کو دنیا کے سامنے اجاگر کرنے کے ساتھ ساتھ پائیدار سیاحت کے فروغ کے لیے بھی کام کر رہا ہے۔