کمشنر ملتان ڈویژن کی میونسپل کارپوریشن کی ترقیاتی سکیموں میں کم لاگت، معیاری ڈیزائن کو یقینی بنانے کی ہدایت

ملتان ۔ 05 اکتوبر (اے پی پی):کمشنر ملتان ڈویژن عامر کریم خان کی زیر صدارت میونسپل کارپوریشن کی اپنی آمدن سے جاری و مجوزہ ترقیاتی سکیموں کا جائزہ بارے اجلاس منعقد ہوا۔

اجلاس میں ڈپٹی کمشنر ڈاکٹر فیصل سلیم نے مجوزہ ترقیاتی سکیموں، تخمینہ لاگت اور تعمیراتی کاموں کے حوالے سے بریفنگ دی۔ اجلاس میں ڈائریکٹر ڈویلپمنٹ مبشر الرحمان، سی او کارپوریشن اقبال خان اور دیگر افسران بھی شریک ہوئے۔ کمشنر ملتان ڈویژن نے ہدایت کی کہ ترقیاتی منصوبوں کی تیاری میں شہریوں کی موجودہ ضروریات کے ساتھ مستقبل کی ضروریات کو بھی مدنظر رکھا جائے۔ انہوں نے کہا کہ منصوبہ بندی کے دوران ٹریفک کی روانی، شہری رابطوں اور بنیادی انفراسٹرکچر کی بہتری کو خصوصی اہمیت دی جائے تاکہ ترقیاتی منصوبوں کے ثمرات عوام تک موثر انداز میں پہنچ سکیں۔

انہوں نے شہر کے مختلف علاقوں میں متبادل روڈ لنکس کی نشاندہی کرنے اور شہری آبادیوں کو بہتر سفری رابطہ فراہم کرنے پر زور دیا۔ کمشنر نے کہا کہ ایسے منصوبے ترجیحی بنیادوں پر شامل کیے جائیں جن سے ٹریفک کے دبائومیں کمی اور شہریوں کے لیے آمدورفت میں آسانی پیدا ہو۔ اجلاس میں تاریخی بازاروں کی خوبصورتی اور تزئین و آرائش کے حوالے سے بھی مختلف تجاویز کا جائزہ لیا گیا۔ اس سلسلے میں یکساں شیڈز، سائن بورڈز اور بہتر لائٹنگ ڈیزائن متعارف کرانے کی تجاویز زیر غور آئیں۔

کمشنر نے ہدایت کی کہ تاریخی بازاروں کی خوبصورتی کے ساتھ ان کی ثقافتی اور تاریخی شناخت کو بھی برقرار رکھا جائے۔ انہوں نے ترقیاتی منصوبوں میں کم لاگت، معیاری ڈیزائن اور دستیاب وسائل کے موثر استعمال کو یقینی بنانے کی ہدایت کرتے ہوئے کہا کہ ہر سکیم کی افادیت اور عوامی ضرورت کو بنیادی ترجیح بنایا جائے۔ انہوں نے کہا کہ شہری انفراسٹرکچر کی بہتری کے لیے وسائل کا دانشمندانہ استعمال ناگزیر ہے۔