اقوام متحدہ۔18مارچ (اے پی پی):اقوام متحدہ کے خصوصی نمائندہ برائے یمن نے سعودی عرب اور ایران کے درمیان حالیہ معاہدے کا خیرمقدم کرتے ہوئے یمن پر زور دیا ہے کہ وہ اس کا فائدہ اٹھائے اور امن کی طرف جائے۔
العربیہ نیوز کے مطابق اقوام متحدہ کے سیکرٹری جنرل انتونیو گوٹریس نے معاہدے کا خیرمقدم کرتے ہوئے خلیجی خطے کے استحکام کے لیے ایران اور سعودی عرب کے درمیان خوشگوار تعلقات کو بہت اہم قرار دیا۔
اقوام متحدہ میں چین کے مستقل نمائندے جنگ شانگ نے اس اجلاس میں کہا کہ معاہدہ آج غیریقینی کی صورت حال سے دوچار دنیا کے لیے ایک خوشی کی خبر ہے اس سے خطے کے امن، استحکام، یکجہتی اور باہمی تعاون کے منظرنامے میں مثبت اضافہ ہوا ہے۔انہوں نے امید کا اظہار کرتے ہوئے کہا کہ اس معاہدے سے یمن میں صورت حال کو بہتری کی طرف لانے میں مدد ملے گی۔
سکیورٹی کونسل کے اجلاس میں ہینس گرنڈبرگ نے ثالثی کے لیے سعودی عرب اور عمان کی کوششوں کو سراہتے ہوئے کہا کہ یمن کی جماعتوں کو اس سے فائدہ اٹھانا چاہیے جو ان کو خطے میں ہونے والے اس سفارتی قدم‘کی صورت میں ان کو ملا ہے۔ وہ پرامن مستقبل کے لیے فیصلہ کن اقدامات کریں۔ واضح رہے کہ سعودی عرب اور ایران نے پچھلے ہفتے بیجنگ میں سفارتی تعلقات بحال کرنے پر اتفاق کیا تھا جو 2016 کے بعد سے معطل تھے۔