یوم عرفہ کا خطبہ رواں سال 35 عالمی زبانوں میں ترجمہ کر کے براہِ راست نشر کیا گیا

میدان عرفات۔5جون (اے پی پی):خادم الحرمین الشریفین کے منصوبے کے تحت یوم عرفہ کا خطبہ رواں سال 35 عالمی زبانوں میں ترجمہ کر کے براہِ راست نشر کیا گیا۔ اس اہم اقدام کا مقصد خطبہ عرفہ کے پیغام کو دنیا بھر کے مسلمانوں تک اُن کی مادری زبانوں میں پہنچانا تھا، تاکہ وہ اس روحانی موقع سے بھرپور فائدہ اٹھا سکیں۔یہ ترجمہ شدہ خطبہ مسجد الحرام اور مسجد نبوی کے امور کی جنرل اتھارٹی نے رئاسة الشؤون الدينية کے تعاون سے تیار کیا۔

نشریات کو "منارۃ الحرمین” پلیٹ فارم، یوٹیوب چینلز، "توکلنا” ایپ، اور دیگر ڈیجیٹل ذرائع کے ذریعے براہِ راست نشر کیا گیا، جس سے دنیا بھر کے لاکھوں مسلمان بآسانی مستفید ہوئے۔مسجد نمرہ اور مسجد الحرام میں متعدد زبانوں میں رہنما پیغامات کی اسکرینز پر نمائش کی گئی، جن کے ذریعے حجاج کو ترجمہ شدہ خطبہ سننے اور دیکھنے کے طریقے بتائے گئے۔

حجاج کو ڈیجیٹل پلیٹ فارمز کے بارے میں آگاہی فراہم کرنے کے لیے خصوصی رہنمائی ٹیمیں بھی تعینات کی گئیں۔اس منصوبے کی کامیاب تکمیل کے لیے 86 افراد پر مشتمل عملہ متحرک رہا، جنہوں نے ترجمہ، رہنمائی، اور تعارفی سرگرمیوں میں حصہ لیا۔ اس کے علاوہ مسجد الحرام اور مسجد نمرہ میں تعارفی کارڈز بھی تقسیم کیے گئے تاکہ حجاج کرام کو خطبہ عرفہ کے اہم پیغامات تک آسان رسائی حاصل ہو۔اتھارٹی کی جانب سے سوشل میڈیا پر بھی آگاہی مہم چلائی گئی،

جس میں مختلف زبانوں میں ویڈیوز اور پوسٹرز شامل تھے۔ یہ تمام اقدامات اس بات کی غمازی کرتے ہیں کہ حجاج کرام کو ایک جامع، مؤثر اور باوقار دینی تجربہ فراہم کرنے کے لیے جدید ترین ٹیکنالوجی اور میڈیا ذرائع کا بھرپور استعمال کیا جا رہا ہے۔