شہدائے کربلا کی قربانیاں انصاف، اتحاد اور اصولی قیادت کے لیے ثابت قدمی کی علامت ہیں،چیئر مین وزیر اعظم یوتھ پروگرام رانا مشہود احمد خان

اسلام آباد۔26جون (اے پی پی):وزیر اعظم یوتھ پروگرام کے چیئرمین رانا مشہود احمد خان نے یوم عاشورہ (10 محرم 1448ھ) کے موقع پر قوم بالخصوص نوجوانوں پر زور دیا ہے کہ وہ صبر، قربانی، انصاف، سچائی اور ثابت قدمی کیلئے حضرت امام حسین (ع) کی لازوال اقدار کو اپنائیں۔عاشورہ کے موقع پر جاری اپنے پیغام میں انہوں نے پاکستانیوں سے ملک کے استحکام اور سماجی ہم آہنگی کو مضبوط بنانے کے لیے نفرت، افواہوں اور اشتعال انگیزی کو مسترد کرتے ہوئے قومی اتحاد، بین المذاہب ہم آہنگی، امن اور رواداری کو فروغ دینے کی اپیل بھی کی۔

رانا مشہود احمد خاں نے کہا کہ حضرت امام حسین رضی اللہ عنہ اور اہل بیت کی عظیم قربانی انصاف، وقار اور اسلام کی حقیقی روح کی لازوال علامت ہے۔ انہوں نے کہا کہ کربلا کا سانحہ انسانیت کو حق، صداقت، جرأت اور اصولوں کے ساتھ غیر متزلزل وابستگی کا لازوال پیغام دیتا ہے۔انہوں نے کہا کہ حضرت امام حسین رضی اللہ عنہ نے جبر، استبداد اور باطل کے سامنے جھکنے سے انکار کر کے امت مسلمہ کے لیے غیرت، آزادی اور استقامت کی لازوال مثال چھوڑی ہے۔انہوں نے کہا کہ عاشورہ مسلمانوں کو بے پناہ چیلنجوں اور قربانیوں کے باوجود سچائی، انصاف، سالمیت اور اعلیٰ اخلاقی اقدار کو برقرار رکھنے کی یاد دلاتا ہے۔

نوجوانوں کو مخاطب کرتے ہوئے انہوں نے نوجوان نسل پر زور دیا کہ وہ حضرت امام حسین رضی اللہ عنہ کی سیرت و کردار سے تحریک حاصل کریں، صبر و تحمل، اخلاقی جرأت، بے لوث خدمت، مثالی طرز عمل اور وطن سے محبت کو اپنائیں۔رانا مشہود احمد خان نے کہا کہ شہدائے کربلا کی قربانیاں انصاف، اتحاد اور اصولی قیادت کے لیے ثابت قدمی کی علامت ہیں۔ انہوں نے مزید کہا کہ یہ اقدار پرامن اور خوشحال معاشرے کی تعمیر کے لیے ضروری ہیں۔انہوں نے زور دیا کہ پوری قوم کو قومی یکجہتی، فرقہ وارانہ ہم آہنگی، رواداری اور بھائی چارے کو مضبوط کرنے کے لیے اجتماعی طور پر کام کرنا چاہیے۔

انہوں نے شہریوں پر زور دیا کہ وہ افواہوں، نفرت اور اشتعال انگیز مواد کو پھیلانے سے گریز کریں اور اس کے بجائے امن، باہمی احترام اور قومی یکجہتی کو فروغ دیں۔رانا مشہود احمد خان نے پاکستان کے نوجوانوں پر زور دیا کہ وہ ملک کی ترقی، استحکام اور قومی ہم آہنگی کو آگے بڑھانے میں تعمیری کردار ادا کریں۔انہوں نے حضرت امام حسین رضی اللہ عنہ، خاندان اہلبیت اور شہدائے کربلا کو خراج عقیدت پیش کرتے ہوئے کہا کہ ان کی لازوال قربانی ہمیشہ انسانیت کے لیے سچائی، انصاف، آزادی اور صداقت کا مینار رہے گی۔

اپنے پیغام کے اختتام پر رانا مشہود احمد خان نے دعا کی کہ اللہ تعالیٰ قوم کو کربلا کے اسباق کو صحیح معنوں میں سمجھنے اور اس پر عمل کرنے کی توفیق عطا فرمائے، انفرادی اور اجتماعی زندگیوں میں انصاف، صبر، ہمدردی اور اتحاد کو پروان چڑھائے۔