اسلام آباد ۔ 12 فروری (اے پی پی) راولپنڈی، اسلام آباد سمیت کشمیر اور گلگت بلتستان میں چند مقامات پر گرج چمک کے ساتھ بارش اور پہاڑوں پر برف باری کا امکان ہے۔ محکمہ موسمیات کے مطابق (آج) بدھ کو ملک کے بیشتر بالائی اور وسطی علاقوں میں مطلع ابر آلود رہے گا تاہم کوئٹہ، ژوب، قلات، مالاکنڈ، ہزارہ، کوہاٹ، پشاور، بنوں، ڈی آئی خان، راولپنڈی ڈویژن، کشمیر اور گلگت بلتستان میں کہیں کہیں جبکہ لاہور، گوجرانوالہ، سرگودہا، فیصل آباد ڈویژن اور اسلام آباد میں چند مقامات پر گرج چمک کے ساتھ بارش اور پہاڑوں پر برف باری کا امکان ہے۔ گزشتہ 24 گھنٹوں کے دوران ملک کے بیشتر علاقوں میں موسم سرد اور خشک رہا تاہم قلات، کوئٹہ، ژوب، مالاکنڈ، ہزارہ، کوہاٹ ڈویژن اور گلگت بلتستان میں چند مقامات پر بارش اور پہاڑوں پر برف باری ہوئی۔ سب سے زیادہ بارش مالم جبہ08، پاراچنار 05، کالام 04، دیر، سیدو شریف، بالاکوٹ02، بگروٹ، سکردو 03، ژوب 06، کوئٹہ اور قلات میں ایک ملی میٹر بارش ہوئی۔ اس دوران مالم جبہ میں 2.0 انچ برف باری ریکارڈ کی گئی۔ منگل کو ملک میں کم سے کم درجہ حرارت بگروٹ منفی07، سکردو، گوپس منفی05، استور، کالام منفی04، مالم جبہ، ہنزہ منفی03 اور میرکھانی میں منفی ایک ڈگری سینٹی گریڈ ریکارڈ کیا گیا۔
