اسلام آباد ۔ 17 مارچ (اے پی پی) 3 بین الاقوامی پی ایس اے ایونٹس میں شرکت کیلئے غیر ملکی کھلاڑیوں کی آمد کا سلسلہ 30 مارچ سے شروع ہو گا۔ پاکستان سکوائش فیڈریشن کے گیم ڈویلپمنٹ آفیسر سکواڈرن لیڈر عامر اقبال نے اے پی پی کو بتایا کہ پروفیشنل سکواش ایسوسی ایشن (پی ایس اے ) نے 3 بین الاقوامی ایونٹس کی میز بانی پاکستان کو دی ہے۔ تینوں ایونٹس آئندہ ماہ اپریل میں اسلام آباد میںکھیلے جائیں گے۔ ایونٹس میں شرکت کیلئے 14 ممالک کے غیر ملکی مرد و خواتین کھلاڑیوں جن کا تعلق سکاٹ لینڈ، مصر، ہانگ کانگ، سپین، کویت، سوئزرلینڈ، کوریا، ایران، بیلجیئم، روس، زمبابوے، جمہوریہ چیک، آئرلینڈ اور جرمنی سے ہے نے شرکت کی تصدیق کر دی ہے۔ پہلا ایونٹ چیف آف دی ائیر سٹاف سرینا ہوٹلز انٹرنیشنل سکوائش ٹورنامنٹ برائے مینز یکم سے5 اپریل تک کھیلا جائے گا اس ٹورنامنٹ کیلئے انعامی رقم 30 ہزار امریکی ڈالرز مقرر کی گئی ہے۔ اس ایونٹ کے ساتھ پی ایس اے برائے خواتین کا ٹورنامنٹ بھی اسی تاریخ میں کھیلا جائے گا۔ ہواوے انٹرنیشل سکوئش ٹورنامنٹ برائے مینز 6 سے 10 اپریل تک کھیلا جائے گا۔ اس ایونٹ کی انعامی رقم 20 ہزار امریکی ڈالرز مقرر کی گئی ہے۔ تینوں ایونٹس مصحف علی سکوائش کمپلیکس اسلام آباد میں کھیلے جائیں گے۔ واضح رہے کہ پاکستان سکوائش فیڈریشن نے سال 2018ء میں اسلام آباد، لاہور اور کراچی میں 16 پی ایس اے ٹورنامنٹس کا کامیابی سے انعقاد کیا گیا ہے جن میں 10 مردوں کے ایونٹس اور 6 خواتین کے ایونٹس شامل تھے۔
