اسلام آباد ۔ یکم جون (اے پی پی)معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ پاکستان تحریک انصاف ملک میں عدلیہ کی آزادی اور قانون کی حکمرانی قائم کرنے کی جدوجہد کا ہمیشہ سے ہر اول دستہ رہی اور رہے گی جبکہ مسلم لیگ (ن) اداروں اور قانون کا احترام اپنی منشاءاور سہولت کے مطابق کرتی ہے، (ن) لیگی متوالوں کا سپریم کورٹ پر حملہ تاریخ کا سیاہ ترین اور شرمناک واقع ہے۔ ہفتہ کو اپنے ٹویٹ میں انہوں نے کہا کہ عدلیہ کی تضحیک میں ”مجھے کیوں نکالا“ کی قریہ قریہ اور نگر نگر مہم قوم کے ذہنوں میں ابھی تک تازہ ہے اور اب مسلم لیگ (ن) کسے بیوقوف بنا رہی ہے۔ ڈاکٹر فردوس عاشق اعوان نے کہا کہ پاکستان تحریک انصاف ملک میں عدلیہ کی آزادی اور قانون کی حکمرانی قائم کرنے کی جدوجہد کا ہمیشہ سے ہر اول دستہ رہی ہے اور رہے گی۔
