اسلام آباد ۔ 22 جولائی (اے پی پی) وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا ہے کہ وزیراعظم عمران خان دنیا میں پاکستان کی پہچان ہیں، انہوں نے اپنی جدوجہد اور مضبوط عزم سے ہمیشہ اپنے مخالفین اور ناقدین کو غلط ثابت کیا، امریکہ کی تاریخ میں سب سے بڑے اوورسیز اجتماع سے خطاب ان کی مقبولیت کا منہ بولتا ثبوت ہے۔ پیر کو اپنے ایک ٹویٹ میں انہوں نے کہا کہ عوامی وزیراعظم نے عوامی انداز سے امریکہ میں مقیم پاکستانیوں کے سامنے نئے پاکستان کا وژن رکھا، ریاست مدینہ کی طرز پر ریاست کے قیام کا تصور پیش کیا، جہاں حکمران عوام کو جوابدہ ہوں، کرپشن کی لعنت سے چھٹکارا اور ریاست امیروں سے لے کر غریبوں اور محروموں پر خرچ کرے۔ ڈاکٹر فردوس عاشق اعوان نے کہا کہ امریکہ میں مقیم قابل فخر پاکستانیوں نے کپتان کا شاندار استقبال کرکے تاریخ رقم کر دی، ہم ان کا شکریہ ادا کرتے ہیں۔
