اسلام آباد ۔ 5 اگست (اے پی پی) وزیرِ اعظم عمران خان نے صوبہ سندھ اور کراچی میں پانی سے متعلق مسائل کے حل کیلئے منصوبے کی منظوری دیدی ہے جس کا اعلان جلد کیا جائے گا۔ ملک میں آبی ذخائر اور پانی سے متعلقہ مسائل کے حل کے حوالے سے پیر کو وزیراعظم عمران خان کی زیر صدارت اجلاس منعقد ہوا۔ اجلاس میں وزیرِ آبی وسائل محمد فیصل واوڈا، سیکرٹری آبی وسائل محمد اشرف، چئیرمین واپڈا لیفٹیننٹ جنرل (ر) مزمل حسین و دیگر سینئر افسران شریک تھے۔ وزیرِ آبی وسائل محمد فیصل واو¿ڈا نے وزیرِ اعظم کو ملک میں آبی ذخائر، خصوصاً سندھ اور کراچی میں پانی سے متعلق مسائل کے بارے میں آگاہ کیا۔ چیئرمین واپڈا نے وزیرِ اعظم کو سندھ میں پانی سے متعلقہ مسائل کے حل کے لئے مجوزہ منصوبے کے بارے میں بریفنگ دی۔ وزیرِ اعظم نے سندھ اور کراچی میں پانی سے متعلق مسائل کے حل کے لئے وزیرِ آبی وسائل اور چئیرمین واپڈا کی جانب سے پیش کردہ منصوبے کی منظوری دی۔
