مانچسٹر ۔ 28 اگست (اے پی پی) سٹار انگلش آل راﺅنڈر بین سٹوکس نے کہا ہے کہ اگر ایشز سیریز کا ٹائٹل نہ جیت سکے تو میرے لئے تیسرے ٹیسٹ کی میچ وننگ اننگز بے معنی ہو گی۔ سٹوکس نے آسٹریلیا کے خلاف تیسرے ایشز ٹیسٹ میچ میں 135 رنز کی غیرمعمولی اننگز کھیل کر ٹیم کو فتح دلوائی تھی۔ اپنے ایک بیان میں سٹوکس نے کہا کہ کینگروز کے خلاف تیسرا ایشز ٹیسٹ میچ جیتنے کے بعد اگلا ہدف ایشز سیریز کا ٹائٹل جیتنا ہے اور مقصد کے حصول کیلئے کھلاڑیوں کو بقیہ دونوں میچز میں خوب جان لڑانا ہو گی۔ انہوں نے کہا کہ آسٹریلوی ٹیم مضبوط اور متوازن ہے، دوباہ ایشز ٹائٹل جیتنے کیلئے کسی ایک کھلاڑی پر انحصار نہیں کر سکتے بلکہ ٹیم کے ہر کھلاڑی کو اپنی ذمہ داری احسن طریقے سے نبھانا ہو گی۔
