بھارت نے نائن الیون کے بعد حق خودارادیت کی تحریک کو دہشگردی سے جوڑنے کی کوشش کی وزیر خارجہ

اسلام آباد۔ 28 اکتوبر (اے پی پی) وزیر خارجہ مخدوم شاہ محمود قریشی نے کہا کہ پاکستان سمیت دنیا بھر یوم یکجہتی کشمیر بھر پور انداز میں منایا گیا اور اندورنی اختلافات کے باوجود ہر سیاسی جماعت نے اس میں حصہ لیا ہے ۔نجی ٹیلی ویژن سے گفتگو کرتے ہوئے انہوں نے کہا کہ بھارت نے نائن الیون کے بعد کشمیریوں کے حق خودارادیت کی تحریک کو دہشگردی سے جوڑنے کی کوشش کی۔ شاہ محمود قریشی نے کہا کہ مقبوضہ کشمیر میں یہ تحریک اگلی نسل تک منتقل ہوگئی ہے۔ انہوں نے کہا کہ دنیا دیکھ رہی ہے کہ پورا مقبوضہ کشمیر بھارت کے اقدامات کے خلاف سراپا احتجاج ہے اور کشمیریوں نے بھارت کے 5 اگست کے اقدامات کو مسترد کر دیاہے۔ بھارت انتشار چاہتا تھا اور اس انتشار سے فائدہ اٹھاتے ہوئے وہ مسئلہ کشمیر کو پس پشت ڈالنا چاہتا ہے لیکن اس کو اپنے عزائم میں بری طرح ناکامی ہوئی ہے۔ پاکستان سمیت دنیا بھر یوم یکجہتی کشمیر بھر پور انداز میں منایا گیا ہے جس سے یہ پیغام واضح ہوا ہے کہ کشمیر کے مسئلے پر ساری قوم متحد ہے۔