سپیکر قومی اسمبلی اسد قیصر کی زیر صدارت اجلاس، اسلام آباد میں پناہ گاہوں کے قیام اور ان سے متعلق دیگر انتظامات کا جائزہ لیا گیا

اسلام آباد ۔ 15 جنوری (اے پی پی) اسلام آباد میں پناہ گاہوں کے قیام اور ان سے متعلق دیگر انتظامات کے جائزے کے لیے سپیکر قومی اسمبلی اسد قیصر کی زیر صدارت بدھ کے روز پارلیمنٹ ہاﺅس میں اجلاس منعقد ہوا۔ اجلاس میں وزیر اعظم کے خصوصی مشیر برائے صحت، ایگزیکٹو ڈائریکٹر پمز، چیف کمشنر اسلام آباد، پناہ گاہ کے کوآرڈینیٹر اور ضلعی انتظامیہ اور سی ڈی اے کے اعلیٰ افسران نے شرکت کی۔ اجلاس میں پناہ گاہوں کے قیام اور ان میں دی جانے والی سہولیات سے متعلق امور پر تفصیلی تبادلہ خیال کیا گیا۔ ضلعی انتظامیہ نے پناہ گاہوں کے قیام اور سہولیات میں اضافے کے لیے اسپیکر کو آگاہ کیا۔ اسپیکر نے تمام اسٹیک ہولڈرز سے اس انقلابی اقدام کو وسعت دینے اور پہلے سے موجود سہولیات میں بہتری لانے کے لئے کہا۔ اجلاس میں پمز میں پناہ گاہ کے قیام کے بارے میں بھی غور کیا گیا۔ انہوں نے کہا کہ پمز میں اولین دستیاب خالی عمارت میں دور دراز علاقوں سے آئے ہوئے مریضوں کے تیمارداروں کے لیے پناہ گاہ فوراًَ قائم کی جائے۔ انہوں نے مزید کہا کہ وزیر اعظم کے وژن کے مطابق لوگوں کو مفت کھانا اور رہائش کی سہولیات فراہم کی جائیں۔ اسپیکر نے پناہ گاہ کوآرڈینیٹر اور ضلعی انتظامیہ کی انسانیت کی خدمت پر ان کی ناقابل فراموش کاوشوں کو سراہا اور اس نیک مقصد کے حصول کے لئے اپنے مکمل تعاون کا یقین دلایا۔ وزیر اعظم کے مشیر خصوصی برائے صحت نے اسپیکر کو یقین دلایا کہ ان کی اہدایات کے عین مطابق پمز ہسپتال کے احاطہ میں موجود عمارت پناہ گاہ کے قیام کے لیے فراہم کر دی جائے گی۔ انہوں نے مزید کہا کہ وزارت صحت اور پمز ہسپتال انتظامیہ کواس ضمن میں ہر ممکن تعاون کے لیے ہدایات جاری کر دی گئیں ہیں۔