اسلام آباد ۔ 11 جون (اے پی پی) وزیر خارجہ مخدوم شاہ محمود قریشی نے کہا ہے کہ پاکستان افغان امن عمل میں، خلوص نیت کے ساتھ اپنا مصالحانہ کردار ادا کرتا رہے گا۔ بھارت،خطے کے امن و استحکام کو اپنی ہندتوا پالیسیوں کے ذریعے تہہ و بالا کرنا چاہتا ہے، عالمی برادری کو صورتحال کا نوٹس لینا ہوگا۔وہ جمعرات کو عالمی وبائی صورتحال، علاقائی و ملکی سلامتی کے حوالے سے اعلیٰ سطحی اجلاس کی صدارت کر رہے تھے۔اجلاس میں وزیر اعظم کے مشیر برائے قومی سلامتی معید یوسف، سیکرٹری خارجہ سہیل محمود ،وزارت خارجہ کے سینیئر افسران اور اعلی عسکری حکام نے شرکت کی۔ اجلاس میں کرونا وبا کے مضمرات ، خطے میں امن و امان کی صورتحال سمیت مختلف خارجہ پالیسی امور پر تبادلہ خیال کیا گیا۔ وزیر خارجہ نے کہا کہ پاکستان میں کورونا وبا تیزی سے بڑھ رہی ہے۔ہمیں احتیاطی تدابیر کو اپناتے ہوئے بحیثیت قوم اس وبا کو شکست دینا ہوگی۔کورونا وائرس کے پھیلاؤ پر قابو پانے کیلئے تمام تر وسائل بروئے کار لا رہے ہیں۔شاہ محمود قریشی نے کہا کہ ایک طرف دنیا کورونا جیسی عالمی وبا سے نمٹنے میں مصروف ہے تو دوسری طرف بھارت،خطے کے امن و استحکام کو اپنی ہندتوا پالیسیوں کے ذریعے تہہ و بالا کرنا چاہتا ہے۔ بھارتی قابض افواج، گذشتہ دس ماہ سے بدترین کرفیو کا سامنا کرنے والے نہتے اور غیور کشمیریوں پر ظلم و ستم کے پہاڑ ڈھا رہی ہیں۔ وزیر خارجہ نے کہا کہ انسانیت کے خلاف بھارتی جرائم کی فہرست طویل تر ہوتی جارہی ہے خطے میں امن و استحکام کی بقا کیلئے، عالمی برادری کو اس صورت حال کا نوٹس لینا ہوگا۔آج بھارت سرکار کے خلاف ہندوستان کے اندر سے آوازیں اٹھ رہی ہیں۔ بھارت کا انتہا پسند چہرہ دنیا کے سامنے بے نقاب ہو چکا ہے۔اجلاس میں افغانستان میں دیرپا قیام امن کی کوششوں کے حوالے سے بھی تفصیلی تبادلہ ء خیال کیا گیا۔ وزیر خارجہ نے کہا کہ پاکستان افغان امن عمل میں، خلوص نیت کے ساتھ اپنا مصالحانہ کردار ادا کرتا رہے گا۔
