راولپنڈی۔21فروری (اے پی پی):سکیورٹی فورسز کی مُلک بھر میں دہشتگرد ی کے خاتمے کیلئے کارروائیاں کامیابی سے جاری ہیں،مجموعی طور پر ملک بھر میں 6921 آپریشنز کے دوران142دہشتگردوں کو ہلاک جبکہ1007کو گرفتار کیا گیا۔سکیورٹی ذرائع کے مطابق حالیہ بڑھتی دہشت گردی کے خلاف سیکورٹی فورسز نے مُلک بھر میں بے شُمار آپریشنز کئے۔سکیورٹی فورسز نے گزشتہ 3ماہ کے دوران نا صرف دہشت گردوں اور اُن کے سہولت کاروں کو گرفتار کیا بلکہ متعدد حملے بھی ناکام بنائے۔
خیبر پختونخواہ میں 1960 آپریشنزہوئے جن میں 1516ایریا ڈومینیشن آپریشنز، 301 انٹیلی جنس بیسڈ آپریشنز،143ایریا سینیٹائزیشن آپریشنز شامل ہیں اس دوران 98دہشتگردوں کو ہلاک اور540کو گرفتار کیا گیا۔بلوچستان میں 3414 آپریشنزکیے گئے جن میں 2980ایریا ڈومینیشن آپریشنز،67انٹیلی جنس بیسڈ آپریشنز، 367ایریا سینیٹایزیشن آپریشنزشامل ہیں، ان آپریشنز میں 40دہشت گرد ہلاک اور112کو گرفتار کیا گیا۔
سندھ میں 752انٹیلی جنس بیسڈ آپریشنز کئے گئے جن میں3دہشت گردوں کو ہلاک اور344کو گرفتار کیا گیا۔پنجاب میں 165انٹیلی جنس بیسڈ آپریشنز کئے گئے۔ ان آپریشنز کے دوران ایک دہشت گرد کو ہلاک اور11کو گرفتار کیا گیا۔مُلک بھر میں دہشتگردی کی روک تھام کے لئے سکیورٹی فورسز کے آپریشنز جاری ہیں۔
Short Link: https://urdu.app.com.pk/urdu/?p=352326
