اسلام آباد۔2اپریل (اے پی پی):پاکستان مسلم لیگ ن کی چیف آرگنائزر مریم نوازنے پاکستان اور چین کے درمیان تین سال بعد خنجراب پاس کے ذریعے تجارت اور آمدورفت کی بحالی پر دونوں ممالک کی قیادت کو مبارکباد دیتے ہوئے کہا ہے کہ 2020ء میں خنجراب پاس کی بندش کے بعد اب 2023ء میں دوبارہ کھلنا بڑی خوشی کی خبر ہے۔
مسلم لیگ ن کے مرکزی میڈیا ونگ سے جاری بیان کے مطابق چیف آرگنائزر مسلم لیگ ن مریم نواز نے کہا کہ خنجراب پاس کے دوبارہ کھلنے سے دونوں ممالک کے عوام کی مشکلات ختم کرنے میں مدد ملے گی۔ انہوں نے کہا کہ پاکستان اور چین کی قیادت پاک چین آہنی بھائی چارہ کو مزید مضبوط بنا رہی ہے،پی ٹی آئی حکومت نے پاکستان چین تجارتی سرگرمیوں اور سی پیک کی رفتار متاثر کی۔ انہوں نے کہا کہ قائد محمد نواز شریف چین پاکستان اقتصادی راہداری منصوبہ (سی پیک) کے معمار ہیں جنہوں نے چین کی مدد سے سی پیک کے ذریعے پاکستان کی ترقی کا عظیم منصوبہ شروع کیا تھا،
نواز شریف دور کی رفتار سے سی پیک اور پاک چین تجارت جاری رہتی تو عوام بدحال نہ ہوتے، چین پاکستان تعلقات قومی سلامتی کی سرخ لکیر ہیں۔انہوں نے کہا کہ فارن فنڈڈ ایجنٹ نے سی پیک اور دیگر منصوبوں پر کرپشن کے بے بنیاد الزامات لگائے تھے۔ مریم نواز نے اللہ کا شکر ادا کرتے ہوئے کہا کہ سی پیک کے خلاف فارن فنڈڈ فتنے کی سازش ناکام بنا دی۔
Short Link: https://urdu.app.com.pk/urdu/?p=358068
