اسلام آباد ۔ 26 جنوری (اے پی پی) وزیر خزانہ، ریونیو، اقتصادی امور، شماریات اور نجکاری سینیٹر محمد اسحاق ڈار کی زیر صدارت جمعرات کو یہاں وزارت خزانہ میں ادارہ شماریات پاکستان کی گورننگ کونسل کا 11 واں اجلاس منعقد ہوا۔ اس موقع پر چیف سٹیٹیشن ادارہ شماریات آصف باجوہ نے وفاقی وزیر اور گورننگ کونسل کو بریفنگ دی اور بتایا کہ 15 ویں خانہ و مردم شماری کے ورک پلان کی تیاری کی جا رہی ہے جو 15 مارچ 2017ءکو شروع ہو گی۔ انہوں نے بتایا کہ تمام متعلقہ سرکاری اداروں بشمول مسلح افواج، نادرا اور صوبائی حکومتوں سے مردم شماری کے حوالہ سے مل کر کام جاری ہے۔ انہوں نے کہا کہ تمام ادارے ہر طرح کا تعاون اور معاونت فراہم کر رہے ہیں۔ انہوں نے مزید بتایا کہ مردم شماری کو بہتر بنانے کیلئے تمام شراکت داروں کے ساتھ قریبی اشتراک کار کو یقینی بنایا جائے گا۔ گورننگ کونسل نے خوشی کا اظہار کیا کہ فیلڈ میں کام کیلئے متعلقہ اہلکاروں کی تقرری پہلے سے مکمل کی جا چکی ہے جن کی تربیت کا عمل جاری ہے۔
