اسلام آباد۔14مارچ (اے پی پی):اسلام آباد چیمبر آف کامرس اینڈ انڈسٹری (آئی سی سی آئی) کے صدر ناصر منصور قریشی کا کہنا ہے کہ چھوٹے اور درمیانے درجے کے کاروبار (ایس ایم ایز) پاکستان کی معیشت میں ریڑھ کی ہڈی کی حیثیت رکھتے ہیں جو جی ڈی پی میں 40 فیصد اور برآمدات میں 30 فیصد حصہ ڈالتے ہیں لیکن اس کے باوجود انہیں بڑے چیلنجز کا سامنا ہے ۔
چیمبر ہائوس کا دورہ کرنے والے کاروباری رہنمائوں کے ساتھ بات چیت میں صدر ناصر منصور قریشی نے اس سلسلے میں جن اہم رکاوٹوں کا ذکر کیا ان میں محدود فنانسنگ، پرانی ٹیکنالوجی اور ہنر مند انسانی وسائل کی کمی شامل ہیں۔انہوں نے سمال اینڈ میڈیم انٹرپرائزز ڈویلپمنٹ اتھارٹی (سمیڈا) پر زور دیا کہ وہ نوجوانوں کو روزگار کی فراہمی اور اقتصادی ترقی کو تیز کرنے پر توجہ دے۔
انہوں نے مزید کہا کہ آئی سی سی آئی ایک کاروباری دوستانہ ماحولیاتی نظام کی تعمیر کے لیے حکومتی اداروں کے ساتھ مل کر کام کرنے کے لیے پرعزم ہے۔صدر ناصر قریشی نے بتایا کہ آئی سی سی آئی یونیورسٹیوں کے ساتھ مل کر ایک جدید ریسرچ اینڈ ڈویلپمنٹ سینٹر کے قیام کا ارادہ رکھتا ہے اور یہ کہ علاقائی یونیورسٹیوں کے ساتھ مفاہمت ناموں کا مقصد اکیڈمیا اور صنعت کے درمیان فرق کو ختم کرنا ہے اور نوجوانوں کو صرف ملازمت کے متلاشی ہی نہیں بلکہ روزگار تخلیق کرنے والے بننے کے لیے بااختیار بنانا ہے۔
صدر ناصر منصور قریشی نے نتیجہ اخذ کیا کہ سٹارٹ اپس کو آگے بڑھا کر، جدت طرازی کو اپنا کر اور ایس ایم ایز کے چیلنجز سے نمٹ کر ہم اقتصادی ترقی کو بڑھاوا دے سکتے ہیں اور روزگار کے بے شمار مواقع پیدا کر سکتے ہیں۔
Short Link: https://urdu.app.com.pk/urdu/?p=572552
