اسلام آباد۔18اپریل (اے پی پی):ملک میں ضروری اشیا کی قیمتوں میں ہفتہ وار بنیادوں پر 0.69 فیصد اور سالانہ بنیادوں پر 2.72 فیصد کی کمی ریکارڈکی گئی۔ ادارہ برائےشماریات پاکستان کی جانب سے ضروری اشیا کی قیمتوں پر ہفتہ وار رپورٹ کے مطابق 17 اپریل کو ختم ہونےو الے ہفتے میں صارفین کے لئے قیمتوں کا حساس اشاریہ 314.92 پوائنٹس ریکارڈکیاگیا جو پیوستہ ہفتے کے مقابلہ میں 0.69 فیصد کم ہے۔ پیوستہ ہفتے میں صارفین کے لئے قیمتوں کا حساس اشاریہ 317.12 پوائنٹس ریکارڈکیاگیاتھا۔ رپورٹ کے مطابق گزشتہ ہفتے کے دوران رورزمرہ استعمال کی 18 اشیا کی قیمتوں میں کمی اور 17 کی قیمتوں میں استحکام رہا۔
اس کے برعکس 16 اشیا کی قیمتوں میں اضافہ ہوا۔ گزشتہ ہفتے کے دوران ٹماٹر کی قیمت میں 22.77 فیصد، چکن 11.05 ، پیاز 9.82، لہسن 8.85، آٹا 2.37، آلو 2.18، سرسوں کا تیل 0.95، ایل پی جی 0.89 اور بناسپتی گھی کی قیمت میں 0.68 فیصد کی کمی ہوئی ۔ اس کے برعکس پرنٹڈ لان کی قیمت میں 1.47 فیصد ، لانگ کلاتھ و جارجیٹ 1.33، دال چنا 1.03، پکی ہوئی بیف 0.74 ، بیف 0.66، پکی ہوئی دال 0.56، مٹن 0.48 فیصد، دال مونگ 0.03، اری چاول 0.02 اور تازہ دودھ کی قیمت میں 0.02 فیصد کا اضافہ ہوا ۔
سب سے کم یعنی 17732 روپے ماہوار آمدنی رکھنے والے گروپ کے لئے قیمتوں کے حساس اشاریے میں 0.80 فیصد کی کمی ہوئی ۔17733 روپے سے لے کر 22888 روپے ، 22889 روپے سے لے کر 29517 روپے ، 29518 روپے سے لے کر 44175 اور اس سے زیادہ ماہوار آمدنی رکھنے والے گروپوں کے لئے قیمتوں کے حساس اشاریے میں بالترتیب 0.80 فیصد، 0.72 فیصد ، 0.73فیصد اور 0.64 فیصد کی کمی ہوئی۔ صارفین کے لئے قیمتوں کے حساس اشاریے کا تعین ملک کے 17 بڑے شہروں کی 50 مارکیٹوں میں 51 ضروری اشیا کی قیمتوں میں کمی بیشی کی بنیاد پر کیا جاتا ہے۔
Short Link: https://urdu.app.com.pk/urdu/?p=584047
