لاہور۔1مئی (اے پی پی):وزیر اعظم کے معاون خصوصی برائے صنعت و پیداوار ہارون اختر خان، وفاقی سیکرٹری صنعت و پیداوار سیف انجم اور سمال اینڈ میڈیم انٹرپرائزز ڈویلپمنٹ اتھارٹی (سمیڈا) کے چیف ایگزیکٹو آفیسر سقراط امان رانا نے کہا ہے کہ پاکستان کی لیبر فورس کے لیے ایس ایم ای سیکٹر میں روزگار اور ہنرمندی کے مواقع بڑھانے کیلئے انٹرنیشنل لیبر آرگنایزیشن سے کام جاری ہے۔ ہارون اخترخان نے کہا کہ وزیر اعظم کے ایس ایم ای ڈیویلپمنٹ ویژن کے مطابق وزارت صنعت و پیداوار صنعتی اور کاروباری کارکنوں کے حقوق کے تحفظ ورسمی مراعات کی فراہمی کے سلسلے میں بھرپور کوشش کر رہی ہے۔
انہوں نے کہا کہ "عالمی لیبر ڈے ” پر ہم پاکستان کے صنعتی و تجارتی شعبے میں مزدوروں کی انمول شراکت کا اعتراف کرتے اور ان کی خدمات کو غیررسمی معیشت سے نکال کر رسمی معیشت کا حصہ بنانے میں کوشاں ہیں۔وفاقی سیکرٹری صنعت و پیداوار سیف انجم نے بتایاکہ وزارت صنعت و پیداوار (ایم او پی)نے انٹرنیشنل لیبر آرگنائزیشن کی شراکت میں "انٹرپرائز فارملائزیشن پروجیکٹ”کےنام سے ایک منصوبہ شروع کر رکھا ہے،اس میں لیبر فورس کی فارملائزیشن بھی شامل ہے جس سے کارکنوں کی ملازمتی صلاحیتوں اور کام کے ماحول کو بہتر بنانے کے ساتھ ساتھ ان کیلئے روزگار کے نئے اور مستحکم مواقع بھی پیدا ہونگے۔
سمیڈا چیف ایگزیکٹو آفیسر سقراط امان رانا نے کہا کہ سمیڈا کی ترقیاتی حکمت عملی میں ہم ایس ایم ای سیکٹر کی مکمل ویلیو چین کا تجزیہ کرتے ہیں جس میں لیبر اہم ترین حصہ ہے ۔انہوں نے مزید کہا کہ سمیڈا کے ترقیاتی منصوبوں میں ملک کی لیبر فورس کے لیے استعداد کار میں اضافے کے اقدامات بھی شامل ہیں تاکہ انھیں روزگار کی منڈی میں مقابلہ کرنے کے لیے ضروری آلات، تربیت اور وسائل فراہم کیے جا سکیں۔ انہوں نے کہا کہ وزارت صنعت و پیداوار کی طرف سے آئی ایل او کے ساتھ شروع کیے گئے انٹر پرائزز فالائزیشن پراجیکٹ سے یہ مسئلہ حل ہوجائے گا۔
Short Link: https://urdu.app.com.pk/urdu/?p=590980
