اسلام آباد۔2مئی (اے پی پی):سوسائٹی فار دی پروٹیکشن آف دی رائٹس آف دی چائلڈ (سپارک) کے زیراہتمام تمباکو اور نیکوٹین مصنوعات کے خلاف 30 روزہ آگاہی مہم جمعہ کو پنجاب کالج سے باضابطہ طور پر شروع ہوگئی۔ "نوجوان تمباکو کے خلاف: صحت مند نسل – مضبوط معیشت” کے عنوان سے جاری اس مہم کا مقصد صحت اور معیشت پر پڑنے والے نقصانات بارے نوجوانوں میں شعور و آگاہی پیدا کرنا ہے۔
اس سلسلے میں سوسائٹی فار دی پروٹیکشن آف دی رائٹس آف دی چائلڈ (سپارک) اور پنجاب گروپ آف کالجز کے اشتراک سے منعقدہ تقریب میں نوجوانوں کے نمائندوں نے حکومت سے مطالبہ کیا ہے کہ آئندہ وفاقی بجٹ 26 -2025میں تمباکو تمباکو اور نیکوٹین انڈسٹری کی مارکیٹنگ کو بے نقاب کرنے کرنے کے ساتھ ساتھ پر زیادہ ٹیکس عائد کیئے جائیں ۔ انھوں نے تمباکو کے خلاف مضبوط اقدامات کی فوری ضرورت پر زور دیا، جو ملک میں بیماریوں اور معاشی دباؤ کا ایک بڑا سبب ہے۔
انہوں نے کہا کہ تمباکو مصنوعات پر ٹیکس میں اضافہ عوام بالخصوص نوجوانوں میں تمباکو کے استعمال کو کم کرنے کے لیے عالمی سطح پر تجویز کردہ انتہائی موثر حکمت عملی ہے۔ انھوں نے تمباکو نوشی کو پاکستان کے نوجوانوں کے لیے سب سے بڑا خطرہ قرار دیتے ہوئے کہا کہ تمباکو نہ صرف ہماری صحت بلکہ ہمارا مستقبل بھی چھینتا ہے ۔ ہمیں متحد ہو کر اپنے نوجوانوں کو اس لعنت سے بچانا ہوگا۔ تقریب سے خطاب کرتے ہوئے سپارک کے پروگرام مینجر ڈاکٹر خلیل احمد نے کہا کہ بچے اور نوجوان تمباکو انڈسٹری کا سب سے کمزور ہدف ہیں۔ "تمباکو پر ٹیکس بڑھانا نہ صرف جانیں بچائے گا بلکہ ہمارے نظام صحت پر معاشی بوجھ کو بھی کم کرے گا۔
ممبر بورڈ آف ڈائریکٹرز سپارک محترمہ خالدہ احمد نے ایک صحت مند نسل کی تشکیل اور اس کے معیشت پر اثرات کی فوری ضرورت پر زور دیتے ہوئے کہا کہ ہمارے نوجوانوں کو ایک صحت مند مستقبل کے لیے بااختیار بنانا صرف اخلاقی فرض نہیں بلکہ معاشی ضرورت بھی ہے۔ڈائریکٹر پنجاب گروپ آف کالجز راولپنڈی/اسلام آباد چوہدری محمد اکرم نے تعلیمی اداروں کے کلیدی کردار کو اجاگر کرتے ہوئے کہا کہ تعلیمی اداروں کو تمباکو کے استعمال کے خلاف قیادت کرنی چاہیے، تاکہ ہمارے طلباء میں صحت مند عادات اور روشن مستقبل کی تشکیل ہو۔اس مہم کے دوران نوجوان مہینہ بھر تمباکو مخالف سرگرمیوں میں بھرپور حصہ لیں گے۔
ان کی سرگرمیوں میں آگاہی کلبز کا قیام، تربیتی نشستوں میں شرکت، تقریری مقابلے، پوسٹر ڈیزائن کرنا، سوشل میڈیا مہمات چلانا، اور ویڈیو پیغامات بنانا شامل ہوں گے، جو 31 مئی 2025 کو عالمی یوم انسداد تمباکو کی شاندار تقریبات پر منتج ہوں گی۔
Short Link: https://urdu.app.com.pk/urdu/?p=591595
