اسلام آباد۔15مئی (اے پی پی):ڈنمارک کے سائیکلسٹ میڈس پیڈرسن نے گیرو ڈی اٹالیہ سائیکل ریس کا پانچواں مرحلہ جیت لیا۔ میڈس پیڈرسن کی یہ گیروڈی اٹالیہ ریس میں مجموعی طور پر تیسری سٹیج فتح ہے۔ البانیہ سے گیرو ڈی اٹالیہ کا 108 واں ایڈیشن شروع ہوچکا ہے جس میں سائیکلنگ کی دنیا کے نامور سائیکل سوار ٹائٹل کے حصول کے لئے کوشاں ہیں۔
گیرو ڈی اٹالیہ سائیکل ریس کے پانچویں مرحلے میں سائیکل سواروں نے سیگلی میسیپیکا سے میٹیرا تک کا فاصلہ طے کرنا تھا جو پہاڑی راستے پر 151 کلو میٹر پر محیط تھا۔29سالہ ڈنمارک کے سائیکلسٹ میڈس پیڈرسن نے عمدہ سائیکلنگ کا مظاہرہ کرتے ہوئے 151کلومیٹر کا فاصلہ 3گھنٹے 27 منٹ اور 31 سیکنڈز میں طے کرکے پانچویں مرحلے میں پہلی پوزیشن حاصل کی۔ اٹلی کے سائیکل سوار ایڈورڈو زیمبینی نے دوسری جبکہ برطانوی سائیکل سوار تھامس پڈکاک نے تیسری پوزیشن حاصل کی۔ ریس میں ڈنمارک کے سائیکلسٹ میڈس پیڈرسن کا پنک جرسی پر قبضہ برقرار ہے ۔
گیرو ڈی اٹالیہ ایک گرینڈ ٹور سائیکلنگ سٹیج ریس ہے جو تین ہفتوں میں مکمل ہوگی جس میں دنیا کے نامور سائیکلسٹس شریک ہیں۔ گیرو ڈی اٹالیہ سائیکل ریس 21 مرحلوں پر محیط ہے جس میں سائیکل سوار 3443.3 کلو میٹر کا سفر طے کرینگے۔ گیرو ڈی اٹالیہ سائیکل ریس میں 23 ٹیمیں ٹائٹل کے حصول کے لئے کوشاں ہیں۔ گیرو ڈی اٹالیہ سائیکل ریس 23 روز جاری رہنے کے بعد یکم جون کو اختتام پذیر ہوگی۔
Short Link: https://urdu.app.com.pk/urdu/?p=597198
