اسلام آباد۔21مئی (اے پی پی):چیئرمین سی ڈی اے، چیف کمشنر اسلام آباد اور ڈی جی سول ڈیفنس محمد علی رندھاوا کی زیر صدارت سی ڈی اے ہیڈکوارٹرز اسلام آباد میں اہم اجلاس منعقد ہوا۔ اجلاس میں ممبر ایڈمنسٹریشن طلعت محمود، ممبر انوائرمنٹ اسفند یار بلوچ، ممبر فنانس طاہر نعیم، ممبر انجنئیرنگ سید نفاست رضا سمیت اسلام آباد انتظامیہ، ایم سی آئی، ڈی ایم اے اور سی ڈی اے کے سنئیر افسران نے شرکت کی۔ اجلاس میں اسلام آباد شہر میں جاری ترقیاتی منصوبوں میں ہونے والی اب تک کی پیش رفت کے حوالے سے بریفننگ دی گئی۔چیئرمین سی ڈی اے محمد علی رندھاوا نے ہدایت کی کہ جناح سکوائر مری روڈ انڈر پاس منصوبے کے افتتاح سے قبل بیوٹیفکیشن اور شجرکاری کا کام جلد مکمل کیا جائے۔
بریفننگ دیتے ہوئے انہیں بتایا گیا کہ منصوبے کے اطراف لینڈ سکیپنگ کا کام شروع کردیا گیا ہے اور مری روڈ انڈر پاس کے اطراف اربن فاریسٹ بھی بنایا جائے گا جس سے ماحولیاتی آلودگی کو کم کرنے میں مدد ملے گی۔اجلاس میں فیض آباد انٹرچینج کی توسیع کے حوالے سے تبادلہ خیال کیا گیا۔ اجلاس کو بتایا گیا کہ فیض آباد انٹرچینج منصوبے کی توسیع کیلئے ٹینڈر جاری کردیا گیا ہے اور جلد ہی تعمیراتی سرگرمیوں کا آغاز کردیا جائے گا۔ اجلاس کو بتایا گیا کہ اسلام آباد شہر میں ٹریفک کے مسائل کے حل کیلئے مختلف مقامات کی نشاندہی کی گئی تھی جہاں پر زیادہ رش ہوتا ہے۔ اجلاس کو بتایا گیا کہ 20 مقامات میں سے 11 مقامات پر ٹریفک کے مسائل حل کرلئے گئے ہیں جبکہ 9 مقامات پر ٹریفک مسائل کیلئے اقدامات اٹھانے جا رہے ہیں۔
اجلاس کو بریفننگ دیتے ہوئے بتایا کہ اسلام آباد کی خوبصورتی کو مزید نکھارنے کیلئےاہم شاہراہوں کی تعمیر و مرمت اور تزئین و آرائش کا کام جاری ہے، ان شاہراہوں پر پینٹ، کرب سٹون کا کام تیزی سے جاری ہے۔ اجلاس میں شاہین چوک کیلئے انڈر پاس کیلئے ڈیزائن کا کام جلد مکمل کرنے کی ہدایت کی گئی۔اجلاس میں بریفننگ دیتے ہوئے بتایا گیا کہ نیشنل پولیس اکیڈمی کا تعمیراتی کام تیزی سے جاری ہے۔ اسی طرح پاک سیکرٹریٹ کی اپ گریڈیشن کے کام کا جلد آغاز کردیا جائے گا۔ اجلاس کو بتایا گیا کہ مارگلہ روڈ، مری روڈ، فیصل ایونیو اور ڈپلومیٹک انکلیو میں مستقل بنیادوں پر جدید اور خوبصورت ایل ای ڈی لائٹس کی تنصیب کو یقینی بنانے کیلئے ٹینڈرنگ کا عمل جاری ہے۔
اجلاس کو بریفننگ دیتے ہوئے بتایا گیا کہ ڈپلومیٹک انکلیو کی تزئین و آرائش کیلئے روڈ انفراسٹرکچر کا کام، شجرکاری اور ایل ای ڈی لائٹس کی تنصیب کا کام جاری ہے۔ چیئرمین سی ڈی اے نے ہدایت کی کہ ڈپلومیٹک انکلیو میں بین الاقوامی طرز کے شاپنگ سینٹر کے قیام کے حوالے سے ورکنگ کی جائے۔ انہوں نے ہدایت کی کہ ڈپلومیٹک انکلیو کے داخلی اور خارجی دروازوں پر جدید اور خوبصورت ڈیزائن بنائے جائیں جن کے زریعے پاکستانی ثقافت و کلچر کو نمایاں کیا جاسکے۔ اسی طرح انہوں نے گندھارا سٹیزن کلب کو آپریشنل اور سپورٹس ایرنا کی اپ گریڈیشن کے حوالے سے کام کو مزید تیز کرنے کی ہدایت کی۔ اجلاس کو بریفننگ دیتے ہوئے بتایا گیا کہ سی ڈی اے ماڈل نرسری کی اپ گریڈیشن کا کام تیزی سے جاری ہے۔
اجلاس کو بتایا گیا کہ اسلام آباد کے دیہی علاقوں میں روڈ انفراسٹرکچر کی بہتری کیلئےکام تیزی سے جاری ہے۔اجلاس میں چیئرمین سی ڈی اے نے پی ڈبلیو ڈی سے ٹرانسفر کئے گئے پراجیکٹس کی الگ سے فہرست اور انکی فزیکل اور مالیاتی رپورٹ پیش کرنے کی ہدایت کی۔اجلاس میں سیکٹر ڈویلپمنٹ میں ہونے والی پیش رفت کے حوالے سے بھی تفصیلی تبادلہ خیال کیا گیا۔ چیئرمین سی ڈی اے محمد علی رندھاوا نے ہدایت کی کہ سیکٹر سی چودہ میں ترقیاتی کاموں کو جلد از جلد مکمل کیا جائے۔ انہوں نے سیکٹر سی پندرہ کے ترقیاتی کاموں کو مزید تیز کرنے کی ہدایت۔اجلاس میں سیکٹر ای بارہ، آئی بارہ اور پارک انکلیو کے ترقیاتی کاموں میں ہونے والی پیش رفت کا بھی جائزہ لیا گیا۔
اجلاس کو بتایا گیا کہ پارک انکلیو فیز ون اور ٹو کے مرکزی گیٹ اور باؤنڈری وال کی تعمیر کیلئے تخمینہ کا عمل مکمل کرلیا گیا ہے اور گیٹس کا ڈیزائن بھی تیار کرلیا گیا ہے جن پر جلد کام کا آغاز کر دیا جائے گا۔ سیکٹر آئی پندرہ کے ترقیاتی کاموں کی تکمیل کے حوالے سے بریفننگ دیتے ہوئے بتایا گیا کہ 85 فیصد سے زائد ترقیاتی کاموں کو مکمل کرلیا گیا ہے۔ اسی طرح سیکٹر آئی پندرہ میں باقی ماندہ ترقیاتی کام بھی شروع کرنے کی ہدایت کی گئی۔چیئرمین سی ڈی اے محمد علی رندھاوا نے ہدایت کی کہ سیکٹر ڈویلپمنٹ میں حائل تمام رکاوٹوں کو ترجیح بنیادوں پر حل کیا جائے تاکہ اسلام آباد شہر میں رہائشی ضروریات کو پورا کرنے کے ساتھ ساتھ نئے پراجیکٹس پر کام کا آغاز کیا جاسکے۔
Short Link: https://urdu.app.com.pk/urdu/?p=599779
