اسلام آباد۔22جون (اے پی پی):سنٹرل ڈائریکٹوریٹ آف نیشنل سیونگز (سی ڈی این ایس) نے رواں مالی سال 2024-25 کی چوتھی سہ ماہی کے آخری دنوں میں اسلامی مالیات میں 24 ارب روپے کی سرمایہ کاری کا سالانہ ہدف حاصل کر لیا ہے۔سی ڈی این ایس نے رواں مالی سال 2024-25 کے لیے اسلامی مالیاتی سرمایہ کاری کا سالانہ ہدف بحال کیا ہےجو ملک کی اسلامی معیشت کی ترقی میں مددگار ثابت ہوگا۔ایک سینئر اہلکار نے اتوار کو اے پی پی سے بات کرتے ہوئے بتایا کہ نیشنل سیونگز نے اسلامی مالیاتی نظام کے فروغ کے لیے اسلامی بانڈز جاری کیےجو ملک میں اسلامی معیشت کی ترقی میں اہم کردار ادا کریں گے۔
ایک سوال کے جواب میں انہوں نے کہا کہ سی ڈی این ایس نے گزشتہ مالی سال 2023-24 میں 75 ارب روپے اسلامی بانڈز سے حاصل کیے تھے اور یہی وجہ ہے کہ ادارہ اسلامی مالیات کے شعبے میں نئی جہتیں متعارف کروانے کا ارادہ رکھتا ہے۔انہوں نے مزید کہا کہ اسلامی مالیات اب عالمی مالیاتی شعبے میں ایک نمایاں کردار ادا کر رہی ہے۔مالی سال 2024-25 کے لیے سی ڈی این ایس کا 1650 ارب روپے کا ہدف، گزشتہ سال کی کارکردگی سے حوصلہ افزائی ہے۔مرکزی نظامِ قومی بچت (سی ڈی این ایس) کے ایک اعلیٰ عہدیدار نے کہا ہے کہ اسلامی مالیات اس وقت دنیا کی کئی بڑی معیشتوں کا اہم حصہ بن چکی ہےاور اسی تناظر میں ادارے میں اصلاحات پر کام جاری ہے تاکہ بچت کے کلچر کو مزید فروغ دیا جا سکے۔
ملک میں موجودہ معاشی رجحانات کو مدنظر رکھتے ہوئے مالی سال 2024-25 کے لیے قومی بچت کے ادارے نے 1650 ارب روپے کا ہدف مقرر کیا ہے۔سی ڈی این ایس نے گزشتہ مالی سال 2023-24 میں شاندار کارکردگی دکھاتے ہوئے 1.7 کھرب روپے کا سالانہ ہدف عبور کر لیا تھا اور 1.742 کھرب روپے کے تازہ بانڈز جاری کیے، جو یکم جولائی سے 30 جون تک کی مدت میں حاصل کیے گئے۔اس سے قبل 2022-23 میں بھی سی ڈی این ایس نے 1.6 کھرب روپے کا ہدف حاصل کر کے سالانہ ہدف سے زائد کارکردگی دکھائی تھی۔ بچت کے ان اہداف میں مسلسل کامیابی عوام کے اعتماد اور ادارے کی اصلاحات کی کامیابی کی عکاس ہے۔
