وزیراعظم محمد نواز شریف آج ضلع جھنگ میں حویلی بہادر شاہ پاور پلانٹ کے پہلے یونٹ سے 760 میگا واٹ بجلی کی فراہمی کا افتتاح کریں گے

وزیراعظم محمد نواز شریف آج ضلع جھنگ میں حویلی بہادر شاہ پاور پلانٹ کے پہلے یونٹ سے 760 میگا واٹ بجلی کی فراہمی کا افتتاح کریں گے،یہ کمبائنڈ سائیکل پاور پلانٹ ہے،صرف 21 ماہ کی مختصر مدت میں اس کے پہلے یونٹ نے پیداوار شروع کر دی

اسلام آباد ۔ 06 جولائی (اے پی پی) وزیراعظم محمد نواز شریف (آج) جمعہ کو ضلع جھنگ میں حویلی بہادر شاہ پاور پلانٹ کے پہلے یونٹ سے 760 میگا واٹ بجلی کی فراہمی کا افتتاح کریں گے۔ جمعرات کو وزیر اعظم میڈیا آفس سے جاری ہونے والے بیان کے مطابق اس منصوبے کی مجموعی گنجائش 1230 میگا واٹ ہے اور اس سے ایل این جی کے ذریعے بجلی پیدا کی جا رہی ہے، یہ کمبائنڈ سائیکل پاور پلانٹ ہے اور صرف 21 ماہ کی مختصر مدت میں اس کے پہلے یونٹ نے پیداوار شروع کر دی ہے۔ سول ورک کی تکمیل، سویچ یارڈ، کولنگ ٹاورز، ایندھن ذخیرہ کرنے کے ٹینکس، گیس ٹربائن اور جنریٹر کی تنصیب کا کام نہ صرف پاکستان کی تاریخ میں ریکارڈ بلکہ عالمی سطح پر بھی ریکارڈ وقت پر مکمل کیا گیا ہے۔ چین کی کمپنی میسرز پاور کنسٹرکشن کارپوریشن اور پاکستان کی کمپنی قوی انجینئرنگ لمیٹڈ نے کامیابی کے ساتھ پہلے یونٹ کا کام مکمل کیا ہے۔ اس منصوبے میں جدید ترین ٹیکنالوجی استعمال کی گئی ہے اور ایل این جی پر اس کی ایفی شینسی 62.44 فیصد ہے۔ نیپرا کی طرف سے دیئے جانے والے اپ فرنٹ ٹیرف کا موازنہ کیا جائے تو اس منصوبے میں 57 ارب روپے کی بچت ہوئی ہے، منصوبے کیلئے ای پی سی کنٹریکٹ دیتے ہوئے پیپرا قوانین پر عمل کیا گیا اور بین الاقوامی مسابقتی بولی کے ذریعے خریداری کے شفاف نظام کو یقینی بنایا گیا ہے، جس کے نتیجے میں فی میگاواٹ کم ترین ای پی سی لاگت آئی ہے۔ اس منصوبے کی پیداوار اور انتظامی لاگت کے لحاظ سے سالانہ 2 ارب روپے کی بچت ہو گی۔ حویلی بہادر شاہ پاور پلانٹ کی ٹربائنوں کی تنصیب بھی ریکارڈ مدت میں تیزی سے ہوئی ہے اور پہلی ٹربائن منصوبے کے مقام پر پہنچنے کے بعد 94 دنوں میں دوسری ٹربائن 74 دنوں میں نصب کی گئی، یہ ماحول دوست منصوبہ اور ملک کیلئے توانائی کے متوازن ذرائع کی فراہمی کے حوالے سے حکومت کے عزم کی طرف ایک اور پیشرفت ہے۔