بلوچستان کے پسماندہ علاقوں کے لیے "نئی راہ” پروگرام کا آغاز کیا جا رہا ہے، چیئرمین پیاس انٹرنیشنل عمران لطیف

اسلام آباد۔7جولائی (اے پی پی):پیاس انٹرنیشنل ہیومن رائٹس کے چیئرمین رانا عمران لطیف نے بلوچستان کے پسماندہ علاقوں میں ترقی، تعلیم اور فلاح و بہبود کے لئے ایک خصوصی منصوبے "نئی راہ” کے آغاز کا اعلان کیا ہے جس کا مقصد ان علاقوں کے عوام کو باعزت زندگی کے مواقع فراہم کرنا، مقامی صلاحیتوں کو اجاگر کرنا اور پائیدار ترقی کی بنیاد رکھنا ہے۔ چیئرمین پیاس انٹرنیشنل نے پیر کو ایک بیان میں کہا کہ بلوچستان کے کئی علاقے آج بھی بنیادی تعلیم، صحت، معاشی مواقع اور خواتین کی شمولیت جیسے اہم شعبوں میں پیچھے ہیں۔

"نئی راہ” کا مقصد ان علاقوں میں مثبت تبدیلی کی راہیں کھولنا ہے۔ "نئی راہ” پروگرام کے تحت متعارف کرائے جانے والے اہم اقدامات میں بچوں اور نوجوانوں کے لئے مفت بنیادی و فنی تعلیم کی فراہمی،مقامی دستکاری اور ہنر مند خواتین کی تربیت اور مصنوعات کی مارکیٹنگ میں مدد ،زراعت کے شعبے میں جدید مشینری کی فراہمی اور کسانوں کی تربیت،نوجوانوں کے لئے چھوٹے کاروباروں کے آغاز میں رہنمائی اور وسائل کی فراہمی،خواتین کو کاروباری مواقع اور خود روزگاری کے منصوبوں میں عملی معاونت کرنا شامل ہے۔

رانا عمران لطیف نے بتایا کہ اس منصوبے کے لئے مقامی آبادی، تعلیمی اداروں اور ترقیاتی شراکت داروں کے ساتھ باہمی مشاورت اور زمینی حقائق پر مبنی منصوبہ بندی کی جا رہی ہے۔ انہوں نے اس امید کا اظہار کیا کہ وفاقی و صوبائی ادارے، مقامی انتظامیہ اور سماجی تنظیمیں اس مشن میں بھرپور تعاون کریں گی۔

چیئرمین نے کہا کہ ہم بلوچستان کے نوجوانوں، خواتین اور کسانوں کو مستقبل میں بااختیار دیکھنا چاہتے ہیں تاکہ وہ خود اپنی تقدیر کے معمار بن سکیں۔ پیاس انٹرنیشنل نے اس عزم کا اظہار کیا ہے کہ وہ اس پروگرام کی شفاف اور مرحلہ وار تکمیل کے لئے تمام ممکنہ وسائل بروئے کار لائے گا تاکہ بلوچستان کے عوام کو ایک روشن، باوقار اور پائیدار مستقبل فراہم کیا جا سکے۔