سیاسی اور عسکری قیادت کے خلاف بدنیتی پر مبنی مہم کے پیچھے کار فرما عناصر سے بخوبی آگاہ ہیں ، وزیر داخلہ محسن نقوی

اسلام آباد۔10جولائی (اے پی پی):وفاقی وزیر داخلہ محسن نقوی نے کہا ہے کہ ہم صدر آصف علی زرداری ، وزیراعظم شہبازشریف اور آرمی چیف کے خلاف بدنیتی پر مبنی مہم کے پیچھے کارفرما عناصر سے بخوبی آگاہ ہیں ،واضح طور پر کہہ چکے ہیں کہ صدر مملکت کے استعفیٰ یا آرمی چیف کی جانب سے صدارت کے منصب کی خواہش سے متعلق کوئی گفتگو ، سوچ یا منصوبہ موجود نہیں،اس بیانیئے میں ملوث عناصر کے لئے واضح پیغام ہے کہ آپ ملک دشمن بیرونی ایجنسیوں کے ساتھ ملکر جو چاہئے کر لیں ہم پاکستان کو مضبوط بنانے کے لئے ہر وہ قدم اٹھائیں گے جو ضروری ہو گا ۔

وزیر داخلہ محسن نقوی نے ایکس پر اپنی پوسٹ میں خبر دار کیا کہ ہم بدنیت مہم کے پیچھے کارفرما عناصر سے بخوبی آگاہ ہیں، گمراہ کن سوچ کون اور کس مقصد کے لئے پھیلا رہا ہے اور اس پراپیگنڈے سے کس کو فائدہ ہو سکتا ہے،مکمل باخبر ہیں ۔انہوں نے کہاکہ صدر مملکت کےمسلح افواج کی قیادت کے ساتھ مضبوط اور قابل احترام تعلقات ہیں ۔

انہوں نے واضح طور پر کہا کہ میں جانتا ہوں کہ یہ گمراہ کن سوچ کون اور کس مقصد کے لئے پھیلا رہا ہے اور اس پراپیگنڈے سے کس کو فائدہ ہو سکتا ہے ۔ وزیر داخلہ نے کہا کہ بری فوج کے سربراہ کی توجہ کا مرکز پاکستان کو مستحکم اور مضبوط بنانا ہے اور اس کے علاوہ کوئی مقصد نہیں ۔ وزیر داخلہ محسن نقوی نے کہاکہ جو لوگ اس بیانیئے میں ملوث ہیں، ان کے لئے واضح پیغام ہے کہ آپ ملک دشمن بیرونی ایجنسیوں کے ساتھ ملکر جو چاہئے کر لیں ہم پاکستان کو مضبوط بنانے کے لئے ہر وہ قدم اٹھائیں گے جو ضروری ہو گا ۔