اسلام آباد۔27اگست (اے پی پی):وفاقی وزیر امور کشمیر و گلگت بلتستان انجینئر امیر مقام نے حالیہ سیلابی صورتحال کے پیشِ نظر صوبائی ایمرجنسی کنٹرول روم گلگت کا دورہ کیا۔ چیف سیکریٹری گلگت بلتستان ابرار احمد مرزا اور ڈائریکٹر جنرل ڈیزاسٹر مینجمنٹ اتھارٹی نے وفاقی وزیر کا استقبال کیا۔
سیکرٹری داخلہ علی اصغر اور ڈی جی جی بی ڈی ایم اے نے متاثرہ علاقوں اور جاری امدادی کارروائیوں کے حوالے سے وفاقی وزیر کو تفصیلی بریفنگ دی۔ اس موقع پر چیف سیکریٹری سمیت اعلیٰ سرکاری حکام نے سیلاب سے پیدا ہونے والی صورتحال پر رپورٹس پیش کیں۔فیڈرل سیکریٹری برائے امور کشمیر و گلگت بلتستان ظفر حسن، سابق وزیراعلیٰ اور صوبائی صدر مسلم لیگ (ن) گلگت بلتستان حافظ حفیظ الرحمن، صوبائی وزیر انجینئر محمد انور اور صوبائی وزیر غلام محمد بھی وفاقی وزیر کے ہمراہ موجود تھے۔
وفاقی وزیر نے انتظامیہ کی کاوشوں کو سراہتے ہوئے وفاقی حکومت کی جانب سے مکمل تعاون کی یقین دہانی کرائی اور ہدایت کی کہ متاثرہ علاقوں میں فوری ریلیف کی فراہمی کو یقینی بنایا جائے۔مزید برآں، وزیراعظم محمد شہباز شریف بھی سیلابی صورتحال اور امدادی کارروائیوں کی براہِ راست نگرانی کر رہے ہیں۔
