تمام شہریوں کے لیے قابل رسائی، منصفانہ اور معیاری صحت کی سہولیات کو یقینی بنانا حکومت کا عزم ہے ، وفاقی وزیر قومی صحت سید مصطفیٰ کمال

اسلام آباد۔12دسمبر (اے پی پی):وفاقی وزیر قومی صحت سید مصطفیٰ کمال نے پاکستان کے لیے تازہ ترین یونیورسل ہیلتھ کوریج (یو ایچ سی) کے نتائج کا اعلان کرتے ہوئے حکومت کے اس عزم کا اعادہ کیا ہے کہ تمام شہریوں کے لیے قابل رسائی، منصفانہ اور معیاری صحت کی سہولیات کو یقینی بنایا جائےگا، ہمارا مشن نئی کوششوں کو مربوط کرنا اور ٹیکنالوجیز کو بہتر بنانا ہے تاکہ ضروری صحت کی خدمات کو عوام کی دہلیز کے قریب ، صحت کی دیکھ بھال کے معیار کو بہتر بنایا جا سکے اور مالی بوجھ کو کم کیا جا سکے ۔ ان خیالات کا اظہار انہوں نے یونیورسل ہیلتھ کوریج (یو ایچ سی) ڈے کے موقع پر کیا۔وزارت قومی صحت نے قومی، صوبائی اور ضلعی سطح پر تازہ ترین یو ایچ سی سروس کوریج انڈیکس کے تخمینے کے نتائج کا اعلان کیا۔

یہ نتائج برطانیہ کے ایویڈنس فار ہیلتھ (ای فار ایچ) پروگرام اور عالمی ادارہ صحت (ڈبلیو ایچ او) کی تکنیکی معاونت سے تشکیل دیئے گئے ہیں۔ یو ایچ سی سروس کوریج انڈیکس (ایس سی آئی) قومی سطح پر 2015ء میں 40 سکور سے بڑھ کر 2024ء میں 54.7 ہو گیا ہے۔ اگرچہ یہ 2015ء کے مقابلے میں قابل تعریف 37.8 فیصد اضافہ ہے، لیکن 2023ء سے صرف 1.5 فیصد سالانہ اضافہ تیز کوششوں کی ضرورت کو اجاگر کرتا ہے۔

وفاقی وزیر قومی صحت سید مصطفیٰ کمال نے پاکستان کے لیے تازہ ترین یو ایچ سی نتائج کا اعلان کیا اور حکومت کے اس عزم کی تصدیق کی کہ تمام شہریوں کے لیے قابل رسائی، منصفانہ اور معیاری صحت کی سہولیات کو یقینی بنایا جائے، ہمارا مشن نئی کوششوں کو مربوط کرنا اور ٹیکنالوجیز کو بہتر بنانا ہے تاکہ ضروری صحت کی خدمات کو لوگوں کے دروازے کے قریب لایا جا سکے، صحت کی دیکھ بھال کے معیار کو بہتر بنایا جا سکے اور مالی بوجھ کو کم کیا جا سکے۔

سید مصطفیٰ کمال نے مزید کہا کہ جب ہم یونیورسل ہیلتھ کوریج ڈے منا رہے ہیں تو ہمیں یاد دلایا جا رہا ہے کہ ہر کوئی، ہر جگہ صحت کی خدمات تک رسائی کا حقدار ہے جس کی انہیں ضرورت ہے، ہمیں صحت کے زیادہ اخراجات کے مسئلے کو حل کرنا ہوگا جو بہت سے لوگوں کے لئے مشکلات کا باعث بنتا ہے۔ ہم 2026–2035 کے لیے ایک نئی نیشنل ہیلتھ اینڈ پاپولیشن پالیسی (این ایچ پی پی) کی طرف بھی بڑھ رہے ہیں جس کا وژن صحت اور آبادی کے شعبے کی منظم ’آزادی‘ ہے جس کا مقصد پاکستان میں صحت کے نظام کو مضبوط بنانے اور بنیادی صحت کی دیکھ بھال کی بہتر فراہمی کے لیے شراکت داریوں، ٹیکنالوجیز اور سرمایہ کاری کے نئے دور کو فروغ دینا ہے۔سال 2024ء کے یو ایچ سی کے نتائج ملک بھر میں مخلوط کارکردگی ظاہر کرتے ہیں۔ اسلام آباد کیپیٹل ٹیریٹری جس کی تعداد 62 ہے، نے تمام صوبوں اور وفاقی علاقوں میں سب سے زیادہ سکور کیا ہے۔

پنجاب 55.2 کے سکور کے ساتھ ہے، خیبر پختونخوا 53.5، سندھ 51.4، گلگت بلتستان 49.7، آزاد جموں و کشمیر 49.5 اور بلوچستان 38.8 پر ہے۔ مجموعی طور پر پاکستان کے 45 اضلاع میں یو ایچ سی ایس سی سکور 40 سے کم ہے جبکہ 39 اضلاع 40-49 کے درمیان ہیں اور 65 اضلاع 50 سے 59 کے درمیان ہیں۔ اب تک ملک کے صرف 9 اضلاع نے یو ایچ سی سکور 60 یا اس سے زیادہ حاصل کیا ہے۔ یہ پاکستان کی پائیدار ترقی کے اہداف (ایس ڈی جیز) کے ہدف یعنی یو ایچ سی سکور 80 یا اس سے زیادہ 2030ء تک حاصل کرنے کے عزم کی طرف ایک نمایاں فرق کو اجاگر کرتا ہے۔ حکومت صحت کے نظام کو مضبوط بنانے اور صحت میں عوامی سرمایہ کاری میں نمایاں اضافہ کرنے کے لیے پرعزم ہے۔

وزیر مملکت ڈاکٹر ملک مختار احمد نے کہا کہ اس سال کا یو ایچ سی ڈے ہمیں ایک بنیادی اصول کی یاد دلاتا ہے کہ ضروری صحت کی خدمات تک رسائی کے لیے کسی خاندان کو غربت میں دھکیل نہیں دینا چاہیے۔وفاقی سیکرٹری صحت حامد یعقوب شیخ نے وفاقی اور صوبائی حکومتوں، صحت کے اداروں اور کمیونٹیز کے درمیان ہم آہنگی کو مضبوط بنانے کی ضرورت پر زور دیا تاکہ سب کے لیے قابل اعتماد، قابل رسائی اور سستی صحت کی سہولیات فراہم کی جا سکیں۔ انہوں نے کہا کہ تعاون اور عزم کے ذریعے ہم یو ایچ سی کو آگے بڑھانے کے لیے پرعزم ہیں تاکہ ’’صحت سب کے لیے‘‘ ایک صحت مند اور خوشحال پاکستان کے لیے حقیقت بنے۔

اس موقع پر برطانوی ہائی کمیشن کی سربراہ ہیلتھ اینڈ ایجوکیشن گروپ ماریا ویارڈ نے برطانیہ کی پاکستان کے ساتھ صحت، آبادی اور یو ایچ سی اصلاحات کے لیے وابستگی اور طویل مدتی شراکت داری کو دہرایا۔ یونیورسل ہیلتھ کوریج صرف صحت کا ہدف نہیں، یہ مساوات اور لچک کی بنیاد ہے۔ اس سال کا یو ایچ سی ڈے ہمیں یاد دلاتا ہے کہ کسی کو پیچھے نہ چھوڑنا ترقی کو تیز کرنا ہے تاکہ ہر فرد، چاہے وہ کہیں بھی رہتا ہو یا کتنا بھی کمائے ، بغیر مالی مشکلات کے ضروری صحت کی خدمات تک رسائی حاصل کر سکے۔

برطانیہ پاکستان میں صحت کے نظام کو سب کے لیے فراہم کرنے میں مدد دینے کے لیے پرعزم ہے۔ اس موقع پر ڈبلیو ایچ او کے نمائندے ڈاکٹر لو ڈاپینگ نے حکومت پاکستان کو یو ایچ سی میں ترقی میں مسلسل کوششوں پر مبارکباد دی۔ انہوں نے اجتماعی عمل کی طاقت پر زور دیا۔ قومی ترجیحات، شواہد اور شراکت داروں کی حمایت کو ہم آہنگ کرنا ملک میں یو ایچ سی اور صحت کی سلامتی کو تیز کرنے کے لیے ضروری ہے۔