اسلحہ پر کنٹرول کے حوالے سے وائٹ پیپر نئے دور میں تخفیف اسلحہ اور اس کے عدم پھیلاؤ میں چینی ذمہ داری اور عزم کو ظاہر کرتا ہے، چینی مندوب

بیجنگ۔18دسمبر (اے پی پی):چین کے سفیر برائے تخفیف اسلحہ شین جیئن نے کہا ہے کہ اسلحہ کنٹرول کے حوالے سے وائٹ پیپر نئے دور میں اسلحہ کنٹرول، تخفیف اسلحہ اور عدم پھیلاؤ میں چینی ذمہ داری اور عزم کو ظاہر کرتا ہے۔ سی جی ٹی این کے مطابق جنیوا میں چین کے مستقل مشن نے سوئٹزرلینڈ کے شہر جنیوا میں ’’نئے دور میں چین کا اسلحہ کنٹرول، تخفیف اسلحہ اور عدم پھیلاؤ‘‘ کے وائٹ پیپر پر بریفنگ دی۔ چین کے سفیر برائے تخفیف اسلحہ شین جیئن نے بریفنگ میں وائٹ پیپر کے اہم مواد اور اس کی اہمیت کا تعارف کرایا۔

جنیوا میں مختلف ممالک کے مستقل نمائندوں، تخفیف اسلحہ کے سفرا اور تھنک ٹینک کے اسکالرز سمیت 100 سے زائد افراد نے اجلاس میں شرکت کی۔شین جیئن نے کہا کہ اقوام متحدہ کے قیام کی 80 ویں سالگرہ کے اس تاریخی موقع پر چین کی جانب سے اسلحہ کنٹرول کے حوالے سے وائٹ پیپر کا اجرا انتہائی اہمیت کا حامل ہے۔ وائٹ پیپر میں نئے دور میں بین الاقوامی سلامتی اور اسلحہ کنٹرول کی صورتحال پر چین کے خیالات اور تجاویز کو منظم طریقے سے بیان کیا گیا ہے۔ان کا کہنا تھا کہ پہلی بار یہ نئے عہد میں منصفانہ ، معاون ،متوازن اور موثر ہتھیاروں کے کنٹرول کے تصور کو پیش کرتا ہے۔

اس وائٹ پیپر میں بین الاقوامی ہتھیاروں کے کنٹرول کے عمل میں چین کی مثبت کوششوں، عملی اقدامات اور نمایاں کامیابیوں کا جامع طور پر تعارف کرایا گیا ہے اور یہ عالمی سکیورٹی گورننس کی فعال قیادت کرنے اور بین الاقوامی امن و سلامتی کے تحفظ میں ایک بڑی طاقت کے طور پر چین کی ذمہ داری اور عزم کا ثبوت ہے۔شرکا نے عمومی طور پر اس بات کو سراہا کہ وائٹ پیپر چین کے سکیورٹی تصورات اور پالیسیوں کو سمجھنے میں مدد کرتا ہے اور وہ ہتھیاروں پر کنٹرول کے کثیر جہتی عمل کو آگے بڑھانے میں چین کے زیادہ کردار ادا کرنے کے منتظر ہیں۔