سیکرٹری پی ایچ ایف نے تیسری چیف آف آرمی اسٹاف نیشنل انٹر کلب ہاکی چمپئن شپ کے شیڈول کا باقاعدہ اعلان کر دیا

لاہور۔1جنوری (اے پی پی):پاکستان ہاکی فیڈریشن (پی ایچ ایف) کے سیکرٹری جنرل رانا مجاہد نے نیشنل ہاکی اسٹیڈیم لاہور میں ایک پرہجوم پریس کانفرنس سے خطاب کرتے ہوئے "تیسری چیف آف آرمی اسٹاف نیشنل انٹر کلب ہاکی چمپئن شپ”کے شیڈول کا باقاعدہ اعلان کر دیا ہے۔ یہ ٹورنامنٹ 4جنوری سے شروع ہو کر 28فروری 2026تک جاری رہے گا۔ پریس کانفرنس کے دوران سیکرٹری پی ایچ ایف کے ہمراہ ہاکی کی دنیا کی مایہ ناز شخصیات اور سابق اولمپینز اختر رسول چوہدری، شہباز احمد سینئر اور قومی ٹیم کے ہیڈ کوچ طاہر زمان بھی موجود تھے۔

پی ایچ ایف کی قیادت اور نامور کھلاڑیوں نے فیلڈ مارشل جنرل سید عاصم منیر کی جانب سے قومی کھیل کی غیر معمولی سرپرستی پر ان کا تہہ دل سے شکریہ ادا کیا۔ رانا مجاہد نے کہا کہ پاک فوج کی براہ راست شمولیت سے پاکستان میں ہاکی کی ساکھ اور وقار تیزی سے بحال ہو رہا ہے۔ انہوں نے واضح کیا کہ فوج کی جانب سے اٹھائے گئے یہ اقدامات وقت کی اہم ضرورت تھے تاکہ دم توڑتے ہوئے قومی کھیل میں ایک نئی روح پھونکی جا سکے اور کھلاڑیوں میں نظم و ضبط اور امید پیدا کی جا سکے۔ٹورنامنٹ کی تفصیلات بتاتے ہوئے انہوں نے کہا کہ یہ چمپئن شپ مختلف مراحل پر مشتمل ہوگی تاکہ ملک کے ہر کونے سے ٹیلنٹ کو سامنے لایا جا سکے۔

پہلا مرحلہ 4 سے 24 جنوری تک ضلعی سطح کے کلبوں کے درمیان کھیلا جائے گا، جس میں مقامی ٹیلنٹ کو اپنی صلاحیتیں دکھانے کا بھرپور موقع ملے گا۔ اس کے بعد ریجنل رائونڈز سے کامیاب ہونے والی ٹیمیں 17سے 28فروری تک شیڈول "نیشنل فیز” میں ٹائٹل کے لیے مدمقابل ہوں گی۔ اس ٹورنامنٹ کے دوران پی ایچ ایف ملک بھر میں ہاکی کلبوں کی سکروٹنی اور رجسٹریشن کا عمل بھی مکمل کرے گی، جبکہ نوجوانوں کی حوصلہ افزائی کے لیے خطیر انعامی رقم اور مراعات بھی دی جائیں گی۔

سابق اولمپین اختر رسول نے اس موقع پر گفتگو کرتے ہوئے کہا کہ آرمی سٹاف ہاکی ٹورنامنٹ کھیل کے لیے ایک بڑا "ٹرننگ پوائنٹ” ثابت ہوگا جو مستقبل کے سٹارز کی دریافت کے لیے نرسری کا کام کرے گا۔ شہباز احمد سینئر نے پاک فوج کی کوششوں کو سراہتے ہوئے کہا کہ ایسے اقدامات سے نوجوان نسل دوبارہ ہاکی گرانڈز کی طرف راغب ہو رہی ہے، جو کہ ایک خوش آئند علامت ہے۔

پریس کانفرنس کے اختتام پر قومی ہیڈ کوچ طاہر زمان نے اس یقین کا اظہار کیا کہ انٹر کلب ماڈل کے تحت منعقد ہونے والی یہ چمپئن شپ باصلاحیت کھلاڑیوں کی شناخت کے لیے کلیدی کردار ادا کرے گی۔ انہوں نے کہا کہ مستقل مقابلوں کے ذریعے ہی پاکستان اپنے ٹیلنٹ پول کو دوبارہ مضبوط بنا سکتا ہے اور بین الاقوامی میدانوں میں اپنا کھویا ہوا مقام حاصل کر سکتا ہے۔