اوکاڑہ ،چیمپئن شپ کے ٹرائلز کا آغاز، ڈسٹرکٹ سپورٹس آفیسر محمد اشفاق کی بطور مہمان خصوصی شرکت

اوکاڑہ۔ 09 جنوری (اے پی پی):سپورٹس جمنیزیم میں انڈر 17 اور 19 نیشنل ریسلنگ چیمپئن شپ کے ٹرائلز کا آغاز ہو گیا ،ڈسٹرکٹ سپورٹس آفیسر محمد اشفاق نےبطور مہمان خصوصی شرکت کی،انڈر 17اور 19 نیشنل ریسلنگ چیمپئن شپ 2026 کے سلسلہ میں ضلعی سطح پر ٹرائلز کا باقاعدہ آغاز ہو گیا، جس میں نوجوان کھلاڑیوں نے شاندار کارکردگی کا مظاہرہ کرتے ہوئے اپنے فن کے جوہر دکھائے، ٹرائلز میں مختلف ویٹ کیٹیگریز کے کھلاڑیوں نے بھرپور مقابلے کیے جبکہ ریسلنگ کے جدید اور روایتی داؤ پیچ دیکھنے کو ملے، مقابلوں کے دوران کھیلوں کے جذبے، نظم و ضبط اور پیشہ ورانہ مہارت کا مظاہرہ نمایاں رہا۔

ڈی ایس او محمد اشفاق نے کھلاڑیوں سے ملاقات کی اور ان کی حوصلہ افزائی کرتے ہوئے کہا کہ ریسلنگ جیسے روایتی کھیلوں کے فروغ کے لیے نوجوانوں کو زیادہ سے زیادہ مواقع فراہم کیے جا رہے ہیں، انہوں نے کہا کہ ٹرائلز کے ذریعے باصلاحیت کھلاڑیوں کا انتخاب کیا جائے گا جو آئندہ انڈر 19 نیشنل ریسلنگ چیمپئن شپ میں ضلع کی نمائندگی کریں گے، ڈی ایس او محمد اشفاق نے مزید کہا کہ نوجوانوں کی صلاحیتوں کو نکھارنے کے لیے تمام ممکنہ اقدامات کیے جائیں گے۔