آریانا سبالینکانے برسبین انٹرنیشنل ٹینس ٹورنامنٹ جیت لیا

برسبین۔12جنوری (اے پی پی):بیلاروس کی نامور ٹینس سٹار اور عالمی نمبر ون آریانا سبالینکا نے یوکرین کی حریف ٹینس کھلاڑی مارتا کوسٹیوک کو شکست دے کر ڈبلیوٹی اے برسبین انٹرنیشنل ٹینس ٹورنامنٹ کا ویمنز سنگلز ٹائٹل جیت لیا۔ سپورٹس ویب سائٹ کے مطابق 27 سالہ آریانا سبالینکا نے خواتین کے سنگلز مقابلوں کے فائنل میچ میں یوکرین کی مارتا کوسٹیوک کو سٹریٹ سیٹس میں شکست دے کر ٹورنامنٹ جیت لیا۔ رواں سال کا پہلا ڈبلیو ٹی اے برسبین انٹرنیشنل ٹینس ٹورنامنٹ آسٹریلیا کے مشہور شہر برسبین میں جاری رہا جس میں شائقین ٹینس کو انتہائی دلچسپ اور کانٹے دار مقابلے دیکھنے کو ملے ۔

کوئنز لینڈ ٹینس سنٹر کے ہارڈ کورٹ پر کھیلے گئے ویمنز سنگلز مقابلوں کے فائنل میچ میں بیلاروس کی نامور ٹینس سٹار اور عالمی نمبر ون آریانا سبالینکا نے انتہائی شاندار کارکردگی کا مظاہرہ کرتے ہوئے یوکرین کی حریف کھلاڑی مارتا کوسٹیوک کو سٹریٹ سیٹس میں 4-6 اور 3-6سے ہرا کر ٹورنامنٹ جیت لیا۔ عالمی نمبر ون ٹینس سٹار آریانا سبالینکا نے برسبین انٹرنیشنل کے فائنل میں یوکرین کی مارتا کوسٹیوک کو سٹریٹ سیٹس میں شکست دے کر مسلسل دوسری بار یہ اعزاز اپنے نام کیا۔

دونوں کھلاڑیوں کے درمیان پیٹ رفٹر ایرینا میں کھیلا گیا یہ مقابلہ صرف ایک گھنٹہ 17 منٹ جاری رہا، جس میں آریانا سبالینکا پورے اعتماد اور کنٹرول کے ساتھ کھیلتی نظر آئیں۔ یہ تیسرا سال تھا جب وہ برسبین انٹرنیشنل کے فائنل تک پہنچیں، جبکہ یہ ان کے کیریئر کا مجموعی طور پر 22واں ڈبلیو ٹی اے ٹائٹل ہے۔یہ ٹورنامنٹ 18 جنوری سے شروع ہونے والے سال کے پہلے گرینڈ سلام آسٹریلین اوپن کی تیاری کے طور پر کھیلا گیا، اور سبالینکا کی یہ فتح میلبورن میں ان کے مضبوط دعوے کو مزید تقویت دیتی ہے۔