سابق ٹیسٹ کرکٹر محمد الیاس انتقال کر گئے، جاوید میانداد اور کامران اکمل کا اظہار افسوس

لاہور۔12جنوری (اے پی پی):سابق ٹیسٹ کرکٹر اور قومی ٹیم کے سابق چیف سلیکٹر محمد الیاس کینسر کے موذی مرض سے طویل جدوجہد کے بعد انتقال کر گئے۔جگر کے کینسر میں مبتلا محمد الیاس کی حالت آپریشن کے بعد مزید بگڑ گئی تھی اور ڈاکٹرز نے انہیں جواب دے کر ہسپتال سے گھر بھجوا دیا تھا۔وہ سوموار کے روز خالقِ حقیقی سے جا ملے۔

خاندانی ذرائع کے مطابق محمد الیاس کا حال ہی میں مقامی ہسپتال میں جگر کا آپریشن کیا گیا تھا،تاہم آپریشن کے بعد بھی ان کی طبیعت سنبھل نہ سکی۔ ڈاکٹروں کے مشورے پر انہیں گھر منتقل کیا گیا،جہاں وہ شدید تکلیف کے عالم میں زیرِ علاج رہے اور بالآخر جانبر نہ ہو سکے۔

ان کے انتقال پر سابق کرکٹر جاوید میانداد،صادق محمد، کامران اکمل سابق وفاقی سیکرٹری سپورٹس اشرف خان نے افسوس کا اظہار کیا ہے جبکہ شائقین اور مداح سوشل میڈیا پر انہیں خراجِ عقیدت پیش کر رہے ہیں۔محمد الیاس کی خدمات کو ہمیشہ یاد رکھا جائے گا۔اللہ تعالیٰ مرحوم کو جوارِ رحمت میں جگہ عطا فرمائے اور اہلِ خانہ کو یہ صدمہ برداشت کرنے کی توفیق دے آمین۔