آئی سی سی انڈر 19 مینز کرکٹ ورلڈ کپ کے گروپ مرحلے کیلئے میچ آفیشلز کے تقرر کا اعلان کر دیا گیا

لاہور۔13جنوری (اے پی پی):15 جنوری سے زمبابوے اور نمیبیا میں مشترکہ طور پر شروع ہونے والے آئی سی سی انڈر 19 مینز کرکٹ ورلڈ کپ کے گروپ مرحلے کے لیے میچ وائز میچ آفیشلز کے تقرر کا اعلان کر دیا گیا۔ ترجمان آئی سی سی کے مطابق ایونٹ کے افتتاحی روز امریکہ اور بھارت کے درمیان کھیلے جانے والے میچ میں رسل وارن اور زاہد بساراتھ آن فیلڈ امپائر ہوں گے جبکہ لوبابالو گکوما ٹی وی امپائر، احمد شاہ درانی چوتھے امپائر اور ڈین کاسکر میچ ریفری کی ذمہ داریاں نبھائیں گے۔افتتاحی دن مجموعی طور پر تین میچز کھیلے جائیں گے۔

زمبابوے اور اسکاٹ لینڈ کے درمیان مقابلے میں مسعودر مکول اور ایڈن سیور آن فیلڈ امپائر ہوں گے، جبکہ تنزانیہ اور ویسٹ انڈیز کے تاریخی میچ میں آئنو چابی اور کوری بلیک امپائرنگ کے فرائض انجام دیں گے۔ یہ مقابلہ تنزانیہ کی کسی بھی آئی سی سی عالمی ایونٹ میں پہلی شرکت ہوگی۔آئنو چابی، جو امارات آئی سی سی انٹرنیشنل پینل آف امپائرز میں شامل دو زمبابوین امپائرز میں سے ایک ہیں، اس ایونٹ میں نمایاں کردار ادا کریں گے۔ ان کے ساتھ فورسٹر موٹیزوا بھی شامل ہیں جو آسٹریلیا اور آئرلینڈ کے درمیان میچ میں پہلی مرتبہ آن فیلڈ امپائر ہوں گے۔

جاپان کے پہلے میچ میں، جو سری لنکا کے خلاف ہوگا، گراہم لائیڈ اپنے والد ڈیوڈ لائیڈ کے نقش قدم پر چلتے ہوئے نیتن باتھی کے ساتھ آن فیلڈ امپائر ہوں گے۔ٹورنامنٹ کے دوران مجموعی طور پر 17 امپائرز اور چار میچ ریفریز فرائض انجام دیں گے۔ ڈین کاسکر کے علاوہ گریم لا بروئے، نیامور راہول اور پرکاش بھٹ بھی میچ ریفری کے فرائض سرانجام دیں گے۔ سپر سکس اور ناک آٹ مرحلے کے لیے آفیشلز کے تقرر کا اعلان بعد میں کیا جائے گا۔

گروپ مرحلے کے دوران مختلف میچز میں رسل وارن، زاہد بساراتھ، لوبابالو گکوما، احمد شاہ درانی، پراگیتھ رامبوک ویلا، شان کریگ، وریندر شرما، فیصل آفریدی، شان ہیگ، گراہم لائیڈ، نیتن باتھی، ڈائٹن بٹلر، ایڈن سیور، مسعودر مکول اور دیگر امپائرز مختلف ذمہ داریاں نبھاتے نظر آئیں گے۔

اسی طرح مختلف میچز میں ڈین کاسکر، گریم لا بروئے، نیامور راہول اور پرکاش بھٹ میچ ریفری کے فرائض انجام دیں گے۔آئی سی سی انڈر 19 مینز کرکٹ ورلڈ کپ 2026 کے ان تقررات کو ایونٹ کے منصفانہ اور شفاف انعقاد کی جانب ایک اہم قدم قرار دیا جا رہا ہے، جس میں دنیا بھر سے نوجوان کھلاڑی اپنی صلاحیتوں کا مظاہرہ کریں گے۔