امریکی کرکٹ ٹیم کے فاسٹ باولر اور پاکستان نژاد علی خان کادعوی، انہیں بھارت کا ویزا جاری نہیں کیا گیا

لاہور۔13جنوری (اے پی پی):امریکی کرکٹ ٹیم کے فاسٹ باولر اور پاکستان نژاد علی خان نے دعوی کیا ہے کہ انہیں بھارت کا ویزا جاری نہیں کیا گیا۔ علی خان نے یہ بات انسٹاگرام اسٹوری پر ایک مختصر کیپشن کے ذریعے بتائی، تاہم انہوں نے اس حوالے سے مزید تفصیلات فراہم نہیں کیں۔امریکہ کی ٹیم کو 7فروری کو ممبئی میں آئی سی سی مینز ٹی ٹوئنٹی ورلڈ کپ 2026کے افتتاحی روز بھارت کے خلاف میچ کھیلنا ہے۔

اس وقت علی خان سری لنکا کے شہر کولمبو میں امریکہ کے تربیتی کیمپ میں موجود ہیں۔ واقعے کے بعد ابھی تک امریکی ٹیم مینجمنٹ کا موقف سامنے نہیں آیا۔امریکہ نے ابھی تک ٹی ٹوئنٹی ورلڈ کپ 2026کے لیے اپنے حتمی اسکواڈ کا اعلان نہیں کیا تاہم توقع ہے کہ سری لنکا میں موجود 18کھلاڑیوں میں سے 15رکنی ٹیم کا انتخاب کیا جائے گا۔ ذرائع کے مطابق اسکواڈ کا انتخاب امریکی کوچنگ سٹاف کرے گا جبکہ ٹیم کے انتظامی اور لاجسٹک امور آئی سی سی کی نگرانی میں انجام دئیے جا رہے ہیں۔

یہ انتظام اس وقت سے آئی سی سی کے پاس ہے جب گزشتہ سال کے آخر میں یو ایس اے کرکٹ کو معطل کر دیا گیا تھا۔35سالہ علی خان اس وقت کولمبو کیمپ میں موجود ان تین امریکی کھلاڑیوں میں شامل ہیں جن کا تعلق پاکستان سے ہے۔ دیگر دو کھلاڑیوں میں احسان عادل شامل ہیں، جو پاکستان کی جانب سے تین ٹیسٹ میچ کھیل چکے ہیں جبکہ محمد محسن بھی کیمپ کا حصہ ہیں۔

اس معاملے پر آئی سی سی کی جانب سے تاحال کوئی باضابطہ بیان جاری نہیں کیا گیا تاہم اطلاعات کے مطابق آئی سی سی صورتِ حال کو حل کرنے کی کوشش کر رہی ہے اور اسے امید ہے کہ ویزا سے متعلق مسئلہ جلد حل ہو جائے گا۔